Kluôm čar Kon Tum ară anei mâo 35 êpul hgŭm bruă, êpul bi hgŭm, phung duh mkra lehanăn giăm 800 klei bi hmô ngă đang war mâo êpul hgŭm phung kahan hđăp ngă khua. Dŭm klei bi hmô rông êmô, bê, mơ̆ng êpul hgŭm kahan hđăp 2 kdriêk Ngọc Hồi, Đăk Glei; klei bi hmô bruă rông ênŭng pioh čhĭ amâo mâo lŭ ôh mơ̆ng êpul kahan hđăp kdriêk Sa Thầy; hdră bi hmô bruă pla ana êa drao mơ̆ng êpul kahan hđăp kdriêk Tu Mơ Rông, ba wĭt klei tŭ dưn jăk, lehanăn lŏ pŏk êlan bi đru kơ ƀĭng kahan hđăp tlaih mơ̆ng klei dleh dlan hŏng klei kjăp. Kahan hđăp A Tôn, ƀuôn Pu Tá, să Măng Ri, kdriêk Tu Mơ Rông mâo đang sâm Ngọc Linh hŏng ênoh lu êklai prăk, brei thâo:

“Gŏ sang kâo pla sâm Ngọc Linh êbeh 10 thŭn leh. Jing êpul kahan hđăp hlăm ƀuôn snăn mâo gĭr hâo hưn mtrŭt mjhar mnuih ƀuôn sang  kơ klei mđĭ kyar bruă duh ƀơ̆ng, đru anak aneh nao sang  hră mơar ênŭm ênap. Tal dua, jing lŏ hâo hưn kơ mnuih ƀuôn sang thâo ba yua klei kreh knhâo, hlăm bruă pla mjing ana êa drao, pla sâm Ngọc Linh mâo ba wĭt jing prŏng snăk"”

Êpul hgŭm kahan hđăp mâo giăm 19.000 ƀĭng hgŭm bi mguôp hlăm 111 êpul bruă hgŭm nah gŭ ti 10 boh kdriêk ƀuôn prŏng hlăm čar. Kyua ngă jăk bruă “kahan hđăp thâo bi đru hdơ̆ng găp bi hrŏ ƀun, duh ƀơ̆ng mbruă”. 5 thŭn êgao hnơ̆ng ênoh gŏ sang ƀun hlăm êpul hgŭm hrŏ mơ̆ng êbeh 16% trŭn adôk kgŭ 8%. Jih jang ƀĭng hgŭm hlăm čar bi đru kơ phung ƀĭng hgŭm msir sang hlang mtih kđuh mâo 500 boh sang tĭ rưč lehanăn mdơ̆ng mrâo 44 boh sang bi đru kơ ƀĭng kahan hđăp.

 Đại tá Võ Thanh Chín – Khua êpul kahan hđăp čar Kon Tum, jing khua kiă kriê knơ̆ng bruă kahan čar êlâo dih, bi êdah klei hdơr knga kơ Khua gĭt Hồ Chí Minh, pô mkŏ mjing mjuăt bi hriăm, lehanăn jing msĕ si sa čô ama kơ êpul lĭng kahan, bi hdơr kơ Đại tướng Võ Nguyên Giáp, khua knơ̆ng kiă kriê lĭng kahan yang ƀuôn Việt Nam. Đại tá Võ Thanh Chín brei thâo, khădah leh wĭt mdei ƀiădah phung knuă druh, khua prŏng hlăm lĭng kahan ăt păn kjăp knhuah gru lĭng kahan Awa Hô:

“Khădah mdei mơ̆ng bruă kahan sui leh, ƀiădah knhuah lĭng kahan Awa Hô ăt dôk guh mngač, jing leh giê knhâo ktrâo êlan kơ jih jang bruă ngă. Hmei ƀuăn đru ai tiê, klei mĭn kơ bruă rŭ mdơ̆ng lehanăn răng mgang lăn čar. Mjuăt bi hriăm hđeh gưl mrâo ai tiê thâo khăp kơ lăn čar, mâo klei jhŏng ktang mơ̆ng knhuah săn asei mlei”.     

Dưn yua knhuah gru lĭng kahan Awa Hô, dŭm gưl phung kahan hđăp čar  Kon Tum mâo nanao klei thâo săng, lehanăn yap anei jing bruă čuăn rŭ mdơ̆ng, răng mgang Đảng, bruă sang čư̆ êa, răng mgang mnuih ƀuôn sang, rơ̆ng kjăp bruă kđi čar, klei êđăp ênang yang ƀuôn hlăm ƀuôn sang jing leh bruă čuăn yuôm bhăn tal êlâo. Hŏng ai tiê bruă klam hlue ngă hdră mtrŭn mrô 04 mơ̆ng bruă Đảng čar Kon Tum kơ klei “Lŏ dơ̆ng mkŏ mjing să dôk hlăm klei dleh dlan hlăm boh klei ară anei”, hŏng klei bi hmô “Êpul êya thâo mkiêt mkriêm, grăp čô thâo mkiêt mkriêm”, êpul hgŭm kahan hđăp mâo đru leh kơ 2 gŏ sang dôk hlăm klei dleh dlan ti ƀuôn Ktu, să Hơ Moong, kdriêk Sa Thầy tlaih mơ̆ng ƀun hŏng klei kjăp. Ară anei dŭm klei bi hmô jăk lŏ dơ̆ng mđĭ mlar lehanăn mâo ngă leh ti ƀuôn Kon Hia 1, să Đăk Rơ Ông, kdriêk Tu Mơ Rông tui hlue hŏng hdră êman mơ̆ng Êpul khua kiă kriê bruă Đảng čar Kon Tum.

Lŏ mñă, bruă mơ̆ng êpul hgŭm kahan hđăp bi đru hdơ̆ng găp bi hrŏ ƀun, mđĭ bruă duah ƀơ̆ng mâo leh dŭm êpul hgŭm hlăm čar Kon Tum mkŏ mjing mâo ngă leh hŏng boh tŭ dưn jăk, dưi bi lar truh hŏng lu alŭ wăl mkăn. Mơ̆ng anăn đru mđĭ leh boh tŭ dưn hlăm klei hdĭp mda, hlăm bruă knuă, mđĭ ai hur har hĭn hlăm klei mă bruă knuă, bi mlih mnơ̆ng pla mnơ̆ng rông, dưn yua jih klei jăk găl mơ̆ng lăn ala yan adiê, mơ̆ng mnuih mă bruă, prăk kăk mâo pioh mđĭ kyar bruă duh mkra. Êpul hgŭm kahan hđăp jhŏng ba yua leh klei kreh knhâo  hlăm bruă knuă. Truh ară anei, ti čar Kon Tum mâo leh sa êpul hgŭm: “Pia êpul hgŭm kahan hđăp duh mkra mnia mblei”, mâo 720 klei bi hmô ngă đang war, 11 êpul hgŭm bruă, 6 êpul bi hgŭm, 12 phung duh mkra mơ̆ng êpul hgŭm kahan hđăp jing pô kiă kriê, mjing leh bruă knuă mă kơ hlăm brô 3 êbâo 500 čô mnuih, dưi mâo ênoh hrui wĭt hơĭt./.