Êlan dơ̆ng pral anei mâo boh taih 729 km găn 12 čar, ƀuôn prŏng mâo dŭm kdrêč êlan Hà Tĩnh - Quảng Trị; Quảng Ngãi - Nha Trang; Cần Thơ - Cà Mau, hŏng kluôm ênoh duh bi liê hlăm brô 147.000 êklai prăl. Hdră anei dưi mbha jing 12 kdrêč điêt, ngă bruă êngiê, dưi bi leh ti thŭn 2025 leh anăn ba yua mơ̆ng thŭn 2026. Truh kơ ară anei, anôk ala mơ̆ng 12 kdrêč dưi ba jao leh 70%, mâo ênŭm hnơ̆ng čoh čuăn kčưm rŭ mjing.

Čiăng bi leh mta kñăm truh ti thŭn 2025 mkŏ mơ̆ng Lạng Sơn truh kơ Cà Mau, Khua knŭk kna Phạm Minh Chính mtă kơ Phŭn bruă êlan klông leh anăn dŭ mdiăng kñăm gĭt gai, ktrâo lač kơ êpul kriê dlăng hdră, đru kčĕ ktuê dlăng phung ngă bruă čiăng bi lar ai tiê bruă klam hĭn, iêo mthưr ai dưi, kdrăp yua, êdeh êdâo, mkŏ mjing hdră ngă bruă kreh knhâo, rơ̆ng mâo boh tŭ dưn, hnơ̆ng tŭ jăk.