Mrâo mdiăng 2 kdô mdiê truh kơ sang kwă hlăm ƀuôn, Klưnh brei thâo, phung mniê tinei jăk êdi, wăt kơ braih huă grăp hruê kăn guôn uêñ lei. Êlâo dih tăp mdiê buk kngan, leh anăn gui brăm wăt mra kyua êlan jhat. Grăp blư̆ hjan prŏng bi klah hjan truh 6-7 mlan. Ară anei, êlan mrâo dưi đru kơ klei êrô êbat, êlan klông jăk găl hĭn.

Êlâo dih dleh dlan êdi, êlan kdrŭt, êngoh duam bi kung đĭ čư̆ nao mdrao. Ară anei mâo êlan bê tông Knŭk Kna mkra brei doh siam, jăk găl êdi. Klei mă bruă mơ̆ng mnuih ƀuôn sang ăt đĭ hĭn, knŏng ƀiă thŭn hŏng anei klei hdĭp mnuih ƀuôn sang đĭ kyar hĭn hŏng êlâo. Mnuih ƀuôn sang lač jăk kơ Knŭk Kna mâo leh klei uêñ mĭn, duh bi liê mkra êlan kơ ƀuôn sang.”

Hriu, khua ƀuôn K’de Kông brei thâo, knhal jih thŭn 2021, êlan bê tông taih 6,6 km mkŏ mơ̆ng êlan dơ̆ng mrô 19 truh kơ ƀuôn K’de Kông, hlăm să H’Ra, kdriêk Mang Yang dưi rŭ mjing, hŏng ênoh bi liê 34 êklai prăk mơ̆ng ngăn prăk čar Gia Lai. Knŏng 1 thŭn êdei, êlan anei dưi ba yua hlăm klei hơ̆k kdơ̆k mơ̆ng mnuih ƀuôn sang krĭng anei. Mâo êlan mrâo, êrô êbat jăk găl, lu boh mnga msĕ si mdiê, ktơr, hbei ƀlang amâodah mnơ̆ng rông amâo lŏ mâo phung blei mjuă ôh, diñu dưi nao blei truh kơ hlăm ƀuôn, đru kơ mnuih ƀuôn sang čhĭ mâo ênoh hĭn. Hriu, khua ƀuôn K’de Kông mñă klă.

“Mơ̆ng Knŭk Kna duh bi liê êlan mơ̆ng să truh kơ ƀuôn, klei hdĭp mnuih ƀuôn sang mâo klei mlih klă sĭt. Bruă dŭ mdiăng mnơ̆ng dhơ̆ng boh mnga msĕ si ktơr, mdiê amâodah ana akasi ăt mâo klei găl hĭn, čhĭ mâo ênoh hĭn. Kyuanăn klei hdĭp mnuih ƀuôn sang hlăm ƀuôn ƀrư̆ ƀrư̆ dưi mđĭ hĭn.”

Mbĭt hŏng bruă mđĭ kyar bruă mkŏ mkra, Bruă sang čư̆ êa kdriêk Mang Yang lŏ jao giăm 400 ha dliê kơ êpul êya ƀuôn K’de Kông kriê dlăng, răng mgang. Bruă anei đru kơ mnuih ƀuôn sang mâo thiăm hnư hrui wĭt mơ̆ng bruă răng mgang dliê, đru bi hơĭt klei hdĭp mnuih ƀuôn sang, dưi tlaih ƀun hơĭt kjăp. Êngao kơnăn, bruă đru hdră duh ƀơ̆ng kơ mnuih ƀuôn sang djuê ƀiă ăt mđup brei ŭn mjeh, êmô mjeh leh anăn lu mjeh ana pla mjing msĕ si kphê, tiu kơ dŭm gŏ sang ƀun. Kyuanăn, lu gŏ sang mâo hnư hrui wĭt dŭm êtuh êklăk prăk grăp thŭn.

Ară anei, hdră ala čar kñăm mđĭ kyar bruă duh mkra ala ƀuôn krĭng mnuih djuê ƀiă dôk hluê ngă bruă mkŏ dăp, bi hơĭt mnuih ƀuôn sang ƀuôn K’de Kông. Hdră anei dăp anôk dôk kơ 33 hlâo ung mô̆ mrâo dôk hjăn, dleh dlan amâo mâo lăn dôk čiăng mkŏ mjing klei găl kơ dŭm gŏ sang hnưm bi hơĭt klei hdĭp, mđĭ kar bruă mkra mjiing. Jing sa hlăm dŭm gŏ sang mda asei dưi dưn hdră anei, ayŏng Aninh ti ƀuôn K’de Kông hơ̆k mơak êdi.

“Anei jing hdră mơ̆ng čar, kdriêk, să duh bi liê kơ ƀuôn sang anôk dôk mrâo čiăng kơ dŭm hlâo ung mô̆ mrâo dôk mdê hriê dôk tinei. Mâo Knŭk Kna duh bi liê bruă mkŏ mkra, mkŏ mjing klei găl kơ mnuih ƀuôn sang mđĭ kyar bruă mkra mjing.

Yung, khua Bruă sang čư̆ êa să Hra, kdriêk Mang Yang, čar Gia Lai brei thâo, ƀuôn K’de Kông mâo giăm 60 gŏ sang, hŏng 270 čô, jih jang jing mnuih Bahnar. Thŭn 2022, hlăm ƀuôn mâo 38 gŏ sang ƀun, mơ̆ng mâo êlan ƀê tông, ară anei gŏ sang ƀun hlăm ƀuôn knŏng adôk mă 13 gŏ sang leh anăn 17 gŏ sang giăm ƀun. Truh kơ ară anei êbeh 70% gŏ sang mâo êdeh êdâo đĭ.

Ƀuôn kde Kông êlâo dih êlan klông dleh dlan. Êngoh duam amâodưi nao mdrao mgŭn. Truh thŭn 2022 Knŭk Kna duh bi liê mkra êlan bêtông klei êrô êbat mơ̆ng mnuih ƀuôn sang mâo klei găl hĭn…mnơ̆ng dhơ̆ng mnuih ƀuôn sang kăn lŏ mâo phung blei mjuă lei…klei hdĭp mnuih ƀuôn sang đĭ kyar hĭn. Lu gŏ sang dưi rŭ mdơ̆ng sang, êlâo dih jing sang hlang, ară anei bruă pla mjing dưi pŏk mlar msĕ si pla kphê, ana akasi, ana mtuk, pla hbei ƀlang…êlan klông găl ba mbĭt lu klei găl kơ mnuih ƀuôn sang. Mnuih ƀuôn sang hơ̆k mơak êjai mâo êlan doh siam, mă bruă ƀrư̆ hruê ƀrư̆ đĭ kyar hĭn.

Kyua dŭm hdră êlan găl guôp, ƀuôn K’de Kông, să Hra, kdriêk Mang Yang, čar Gia Lai dôk ƀrư̆ ƀrư̆ bi mlih, bŏ hŏng klei hmăng hmưi kơ êdei anăp.