Ti knăm anei, Khua Anôk bruă kƀĭn ala Trần Thanh Mẫn mñă klă Đảng, Knŭk kna mđing dlăng nanao kơ dŭm anôk bruă duh mkra hlăm anăn mâo Êpul grŭp Tuh tia mkra mjing Êa pui êwa čuh ala čar Việt Nam. Khua anôk bruă kƀĭn ala hưn mthâo, Dhar bruă gĭt gai anôk bruă kƀĭn ala mrâo brei klei blŭ ba mdah kơ Anôk bruă kƀĭn ala  bi mklă bruă mkra mlih Hdră bhiăn kriê dlăng lehanăn duh bi liê prăk duh mơ̆ng knŭk kna ti dŭm anôk bruă duh mkra. Bruă mkra mlih hdră bhiăn anei srăng mjing klei găl, ruh mtlaih klei dleh dlan kơ bruă duh mkra, mnia mblei.

Hlăm wưng êgao, anôk bruă kƀĭn ala, knŭk kna lu blư̆ mkra mlih leh hdră bhiăn hluê ai tiê ruh mtlaih klei gun kpăk čiăng kơ lăn čar mŭt hlăm wưng mrâo, ênuk kpưn đĭ mơ̆ng djuê ana lehanăn mâo hnơ̆ng đĭ kyar 8% hlăm thŭn anei. Khua Anôk bruă kƀĭn ala tĭng dlăng myuôm êpul grŭp hluê ngă leh hdră đru kơ yang  ƀuôn ba wĭt lu boh tŭ dưn, đru mdơ̆ng sang hră, kban êlan, sang khăp čiăng, sang hgŭm mguôp, đru kơ mnuih ƀuôn sang mdrơ̆ng hŏng klei yan adiê ngă, klei êa lip lêč, klei ruă tưp../.