Ti anôk mdrao mgŭn să Tu Mơ Rông, kdriêk Tu Mơ Rông, čar Kon Tum, phung ruă tinei ăt čiăng sơăi mâo aê mdrao Hà čuă dlăng, mkă dlăng. Amai Y Hà hlăk mblang, 26 thŭn ngă bruă hŏng Anôk bruă mgao mgŭn să Đăk Hà, leh anăn anôk bruă mdrao mgŭn să Tu Mơ Rông, kdriêk Tu Mơ Rông thâo kral jih grăp čô pô ruă, leh anăn jih jang mnuih Sêdang k’iêng ti krĭng lăn anei, mnuih ƀuôn sang jih dua să jing mnuih Sêdang kyua thâo săng boh blŭ, knhuah gru djuê ana. Ksiêm kriêm mơ̆ng bruă sang čư̆ êa, mnuih ƀuôn sang leh anăn phung ngă bruă mdrao mgŭn anôk bruă dưi thâo, đru mguôp prŏng hĭn mơ̆ng khua anôk bruă mdrao mgŭn Y Ha hlăm 26 thŭn êgao jing dưi ba phung mniê mnuih Sêdang nao kkiêng anak ti anôk bruă, lui hĕ klei kkiêng anak hlăm sang. Hŏng Amai Y Hà, klei hơ̆k mơak prŏng dưi jing dưi ƀuh bruă kriê dlăng klei suaih prak mơ̆ng mnuih Sêdang ƀrư̆ hruê ƀrư̆ jăk hĭn:

“Êlâo dih klei ruă tưp dleh dưi ksiêm dlăng, mâo lu êdi ƀiădah ară anei bruă kriê dlăng klei suaih pral nao truh kơ grăp gŏ sang, truh kơ ƀuôn sang. Pô tinei amâo lŏ mâo klei êngoh bi ktư̆, bi hrŏ klei ruă Êngoh bi blĕ êrah, klei ruă čut, dŭm klei ruă tưp. Hlăm bruă gang mkhư̆ klei ruă tưp dưi ƀuh lu klei mlih. Hmăng hmưi jih jang mnuih ƀuôn sang hlăm alŭ wăl uêñ mĭn kơ klei suaih pral pô”.

Hlăm 26 thŭn mă bruă, jih ai tiê hŏng bruă mdrao mgŭn krĭng dleh dlan Tu Mơ Rông, hŏng phung ruă jing mnuih Sêdang, amai Y Hà găn leh lu klei dleh dlan čiăng tui tiŏ klei hriăm leh anăn jing anôk knang đru kơ mnuih ƀuôn sang kriê dlăng klei suaih pral jăk hĭn, Mă êjai hriăm êjai, thŭn 2017 amai dưi bi leh klei hriăm Cử nhân điều dưỡng klei ƀă kkiêng anak. Hŏng bruă klam jing khua anôk bruă mdrao mgŭn să Tu Mơ Rông, mbĭt hŏng kiă kriê dŭm mta bruă hlăm anôk bruă, amai Y Hà ăt jêñ jêñ nao ti 8 ƀuôn hlăm să čiăng thâo klă boh sĭt, bi tuôm, hâo hưn kơ mnuih ƀuôn sang uêñ mĭn kriê dlăng klei suaih pral. Hlăm klei ngă bruă ăt hrăm mbĭt hŏng phung nai mdrao hlăm anôk bruă lu blư̆ dŏng hdĭp amĭ leh anăn anak ĭ.  Jih ai tiê hŏng bruă mdrao mgŭn krĭng dleh dlan leh anăn mnuih ruă mơ̆ng amai Y Hà mâo phung mă bruă mbĭt bi myuôm. Amai Phan Thị Thanh Vân, ti anôk bruă mdrao mgŭn să Đăk Hà brei thâo:

“Amai Y Hà jing sa čô hur har hlăm djăp mta bruă. Ti anôk bruă grăp hruê ktrâo lač phung mă bruă mdrao mgŭn ngă dŭm mta bruă djŏ hnơ̆ng čuăn. Amai ăt nao hgŭm hŏng phung ayŏng adei truh ti alŭ ƀuôn čiăng hâo hưn bruă kriê dlăng klei suaih pral leh kkiêng anak, truh kơ hdră tlŏ mgang. Amai uêñ mĭn đru kơ phung amai adei hlăm anôk bruă”.

 Bi Aê mdrao Nguyễn Thành Thảo, K’iăng khua kiă kriê anôk bruă mdrao mgŭn kdriêk Tu Mơ Rông brei thâo:

“Amai Y Hà hur har êdi hlăm bruă kriê dlăng klei suaih pral mnuih ƀuôn sang hlăm alŭ wăl. Hŏng ai tiê hur har mơ̆ng amai uêñ mĭn kơ mnuih ƀuôn sang hlăm alŭ wăl leh anăn amai mâo klei mĭn kpưn đĭ hlăm klei mă bruă. Amai Y Hà jing sa gru hmô êdah êdi mơ̆ng anôk bruă”.

Mâo 26 thŭn ngă bruă kriê dlăng klei suaih pral mnuih ƀuôn sang, Amai Y Hà, khua anôk bruă mdrao mgŭn să Tu Mơ Rông, kdriêk Tu Mơ Rông, čar Kon Tum jing anôk knang kơ mnuih Sêdang tinei. Klei duh myơr, ai tiê bruă klam leh anăn khăp kơ bruă mă mơ̆ng amai dôk đru bi mlih klei mĭn, đru kơ mnuih ƀuôn sang krĭng mâo lu klei dleh dlan anei dưi mâo bruă mdrao mgŭn jăk hĭn. Hluê anăn, drei dưi ƀuh ai tiê săn asei, klei gĭr mơ̆ng phung knuă druh, phung mă bruă mdrao mgŭn krĭng taih kbưi. Mbĭt anăn bi êdah klei bi mguôp, klei sa ai mơ̆ng phung mă bruă mdrao mgŭn leh anăn mnuih ƀuôn sang hlăm alŭ wăl. Drei ƀuh klei ktưn hưn mơ̆ng mnuih Sêdang ti alŭ wăl êjai mâo phung nai mdrao msĕ si amai Y Hà, đru bi mlih klei mĭn, pŏk klei găl mâo bruă mdrao mgŭn jăk kơ mnuih ƀuôn sang.