Blŭ hrăm ti anôk drông anăn, Khua kiă kriê ƀuôn prŏng Viêng Chăn Ạt-sạ-phăng-thông Sỉ-phăn-đon bi êdah klei mơak ƀuh klei đĭ kyar kjăp mơ̆ng ƀuôn prŏng phŭn Hà Nội hlăm djăp mta bruă hlăm wưng leh êgao. Lehanăn mâo klei yăl dliê kơ ƀuôn prŏng phŭn Viêng Chăn, Khua kiă kriê brei thâo, klei duh mkra mơ̆ng ƀuôn prŏng mâo leh klei đĭ kyar jăk kah knar truh 4,3%, hŏng ênoh mâo hrui wĭt kah knar hlăm brô êbeh 5.500 USD/thŭn.

Knŏng hlăm 9 mlan thŭn anei, Viêng Chăn djăp leh sơăi ênoh čuăn ba wĭt ngăn prăk kơ knŭk kna, hŏng ênoh jing kdlưn hĭn hlăm brô 20% hlăm thŭn anei. Khua bruă Đảng Hà Nội Đinh Tiến Dũng čang hmăng Viêng Chăn ksiêm dlăng ksiêm wĭt leh bruă hgŭm plah wah dua boh ƀuôn prŏng phŭn wưng leh êgao, mơ̆ng anăn mtrŭt dŭm kdriêk wăl krah lŏ dơ̆ng mđĭ hĭn klei thâo bi mguôp plah wah dua nah Hà Nội hŏng Viêng Chăn, mjing klei bi hmô jăk klei bi mguôp plah wah dŭm alŭ wăl mơ̆ng dua ala čar Việt Nam - Lào, đru sĭt kơ klei bi mguôp plah wah dua Đảng, dua lăn čar.