Hluê si klei bi klă, Êpul khua bruă Đảng čar Kon Tum tiŏ nao Xiêng Thanh Phúc, khua hlăm bruă Đảng čar, Khua bruă đoàn čar Kon Tum păn ngă Khua kiă Adŭ bruă Đảng čar. Xiêng Thanh Phúc, mnuih djuê ana Jeh – Triêng, k’kiêng thŭn 1983 ti să Đăk Nông, kdriêk Ngọc Hồi, čar Kon Tum. Ñu nao hgŭm hlăm bruă đoàn mơ̆ng thŭn 2008 leh anăn mâo klei hriăm thạc sĩ kơ bruă kriê dlăng bruă knŭk kna. Mơ̆ng thŭn 2016 truh kơ ară anei ngă khua bruă đoàn čar.

Blŭ êjai đĭ păn ngă khua kiă adŭ bruă Đảng čar Kon Tum, Xiêng Thanh Phúc, bi êdah klei lač jăk kơ klei đăo knang mơ̆ng Êpul khua bruă Đảng čar Kon Tum leh anăn ƀuăn amâo mâo mdei klei hriăm, mjuăt pô čiăng bi leh jăk bruă klam. Êlâo kơnăn ti hruê 30/3, Êpul khua bruă Đảng čar Kon Tum mkŏ mjing leh knăm ba mdah leh anăn jao klei bi klă mlih tuôr, tiŏ nao leh anăn ruah mdưm Thái Văn Tưởng, khua hlăm bruă Đảng čar, Khua kiă adŭ bruă Đảng čar păn ngă khua bruă Đảng kdriêk Đăk Glei.