Aguah hruê 21/8, Khua bruă kƀĭn ala Belgium Stéphanie D'Hose mbĭt hŏng Êpul bi ala Belgium truh leh ti tač êdeh phiơr Nội Bài (Hà Nội), mphŭn gưl hiu čhưn ti Việt Nam mơ̆ng hruê 21-25/8/2023 hluê asăp jak iêu mơ̆ng Khua gĭt gai Anôk bruă kƀĭn ala Vương Đình Huệ. Việt Nam lehanăn Belgium mkŏ mjing leh Klei bi mjĕ thŭn 1973. Mơ̆ng leh mkŏ mjing klei bi mjĕ, hdră bi hgŭm plah wah dua ala čar đĭ kyar jăk siam nanao. Khua bruă kƀĭn ala Belgium Stéphanie D'Hose jing khua gưl dlông mơ̆ng Belgium hriê čhưn ti Việt Nam hlăm thŭn 2023.

Anei ăt jing wưng dua ala čar bi hdơr 50 thŭn Hruê mkŏ mjing klei bi mjĕ (22/3/1973-22/3/2023) lehanăn 5 thŭn ƀĭng hgŭm phŭn hlăm bruă lŏ hma. Gưl hiu čhưn bi êdah klei mpŭ mơ̆ng Khua gĭt gai Belgium hlăm klei bi mjĕ hŏng Việt Nam lehanăn lŏ čuê gưl hiu čhưn mơ̆ng Khua anôk bruă kƀĭn ala Vương Đình Huệ hlăm mlan 9/2021. Gưl hiu čhưn kñăm mtrŭt mđĭ hdră bi hgŭm bruă duh mkra, mnia mblei lehanăn duh bi liê plah wah anôk bruă kƀĭn ala Việt Nam lehanăn Belgium, mđĭ hdră bi hgŭm dua nah ti dŭm klei kƀĭn trông lu tĭng msĕ si Êoul hgŭm lu ala čar, dŭm klei bi kƀĭn hlăm krĭng lehanăn tar rŏng lăn./.