Hlăm mmông drông, Khua Êpul grup Tokyu hưn hŏng Khua bruă kƀĭn ala kơ boh tŭ bi hgŭm plah wah Tokyu leh anăn Becamex hlăm klei mđĭ kyar anôk bruă nah gŭ ƀuôn prŏng ti Bình Dương; mbĭt anăn bi mni kơ čar Bình Dương mđing dlăng, đru leh anăn mjing klei găl kơ Êpul grup hlăm hdră bi hgŭm, bi liê ti alŭ wăl.

Bi mni kơ klei mđĭ kyar leh anăn đĭ kyar pral mơ̆ng Việt Nam hlăm wưng êgao, Khua Êpul grup Tokyu čang hmăng lŏ dơ̆ng bi hgŭm, kah mbha klei thâo hlăm 100 thŭn êgao kơ klei mđĭ kyar ƀuôn prŏng, kñăm mkŏ mjing Bình Dương jing ƀuôn prŏng mtah, thâo mĭn leh anăn năng hdĭp. Hŏng 50 thŭn hlăm bruă mđĭ kyar ƀuôn prŏng, Khua Êpul gơ̆ng kriê dlăng Êpul grup Tokyu čang hmăng kah mbha klei thâo pô leh anăn Êpul grup čiăng pŏk mlar bruă bi liê hlăm bruă nah gŭ ƀuôn prŏng ti Việt Nam, hlăm anăn mâo čar Bình Dương.