Êpul mtrŭt mđĭ klei hriăm hră mơar Việt Nam dưi mkŏ mjing mlan 10/1996. Truh kơ ară anei, Êpul mâo giăm 27 êklăk čô hgŭm, mkŏ mjing wăl ngă bruă kluôm, đru mtrŭt mjhar klei hriăm hră mơar, mtrŭt mjhar phung thâo, mkŏ mjing yang ƀuôn bi hriăm hră ƀrư̆ hruê ƀrư̆ đĭ kyar. Hlăm mmông bi tuôm, bi ala Khua gĭt gai Đảng, knŭk kna, Khua lăn čar Lương Cường bi mni, bi myuôm dŭm klei đru mguôp hgăm ƀiădah tŭ dưn mơ̆ng phung knuă druh.

Khua lăn čar lač klă, mơ̆ng hruê mkŏ mjing ala čar truh kơ ară anei, Đảng, knŭk kna leh anăn Awa Hồ bi myuôm nanao bruă mđĭ klei thâo kơ mnuih ƀuôn sang, mtô mjuăt mnuih mă bruă, bi hriăm phung thâo. Dlăng kơ bruă sang hră mơar jing Hdră êlan lăn čar mrô 1, jing hdră êlan sa anăn hlăm bruă mkŏ mjing leh anăn mđĭ kyar lăn čar. Bruă mkŏ mjing Việt Nam jing ala čar hriăm, hlăm anăn grăp čô mnuih ƀuôn sang mâo klei găl dưi hriăm leh anăn dưi mtrŭt mjhar klei hriăm hră, amâo djŏ knŏng sa mta kñăm, ƀiădah ƀiădah lŏ jing klei čiăng êdi čiăng mđĭ ai bi ktưn mơ̆ng ala čar, mđĭ kyar mnuih thâo leh anăn bi kjăp ai dưi djuê ana čiăng čhuang mŭt hlăm wưng mrâo.