Ti čar  Khánh Hoà, leh êbeh 5 mlan yua KPI – hnơ̆ng mrô mkra boh tŭ dưn bruă knuă brei ƀuh, KPI amâo djŏ knŏng mdei hlăm dŭm ênoh mrô hlăm măi tĭnh ƀiădah lŏ jing giê mkă hnơ̆ng jăk klei mă bruă mơ̆ng grăp čô leh anăn êpul êya. Phạm Minh Nhựt, khua êpul hgŭm bruă hiu čhưn ênguê Nha Trang Khánh Hòa brei thâo:

 “Bruă dưn yua KPI hlăm djăp mta bruă ăt ba wĭt boh tŭ dưn. Hŏng knuă druh êjai ba yua dŭm hnơ̆ng čuăn, grăp čô thâo klă ya bruă pô srăng mă, si srăng mă. Êjai pô mgaih msir bruă knuă srăng săng ya pô srăng mă leh anăn si srăng ngă čiăng kơ jăk đru kơ phung dưn bruă anăn dưi mgaih msir pral hĭn”.

            Kyua KPI, khua gĭt gai čar thâo klă mmông mă bruă kah knar grăp hruê mơ̆ng dŭm anok bruă. Sitôhmô, êpul anôk bruă hlăm bruă Đảng čar, bruă mặt trận čar, bruă Đảng dŭm anôk bruă mâo 4,97 mmông, êpul bruă sang čư̆ êa gưl čar 6,13 mmông, dŭm anôk bruă 6,11 mmông, bruă Đảng dŭm ƀuôn hgŭm 5,21 mmông leh anăn bruă sang čư̆ êa ƀuôn hgŭm 6,17 mmông. Ti anôk bruă êpul kriê dlăng anôk bruă duh mkra leh anăn tuh tia čar Khánh Hoà, khua êpul Trần Minh Chiến brei thâo, hŏng KPI, hnơ̆ng jak klei ngă bruă dưi êdah klă msĕ hŏng rup kač:

 “Hŏng KPI srăng mđi hĭn hnơ̆ng jăk, knuă đruh ƀuh klă bruă klam kluôm mơ̆ng anôk bruă. Mnuih mă bruă amâo mâo đĭ, bruă srăng đĭ lu. Kyuanăn, srăng mđĭ hnơ̆ng mă bruă hŏng klei mtô mjuăt, dưn yua kdrăp mrâo mrang ktang hĭn”.

Čar Khánh Hoà leh bi mŭt mbĭt dôk mâo dŭm hnơ̆ng čuăn: klei đĭ kyar GRDP kah knar 11% - 12% hlăm sa thŭn. GRDP sa čô hlăm Êpul 10 hlăm kluôm ala, bruă duh mkra mrô mâo 35% GRDP; hnơ̆ng ƀuôn prŏng mâo 70%. Klei lông dlăng nao mbĭt ăt prŏng mơh: dua anôk kpăk kơ bruă mkŏ mkra hdră êlan ( boh nik jing bruă mkŏ mkra mrô) leh anăn ai dưi hnơ̆ng tŭ jăk, ăt čiăng mđĭ hnơ̆ng tŭ jăk knuă druh. Kyuanăn, KPI jing mta mnơ̆ng čiăng mkă, ktuê dlăng klei ngă dŭm mta kñăm anei, mjing klei gĭr jing klei čih pioh klă mngač. Khua bruă Đảng čar Khánh Hoà Nghiêm Xuân Thành mñă klă KPI srăng jing mnơng kiă kriê leh anăn jing kdrông mkŏ plah wah mta kñăm leh anăn boh tŭ dưn ngă bruă grăp hruê:

 “Bruă ba yua KPI srăng brei ƀuh ênoh mnuih mă bruă čiăng êdi. Dlăng kơ mmông mă bruă srăng thâo ti anôk bruă dôk êbeh amâodah kƀah knuă druh, dŭm čô dôk êbeh, ya bruă dôk êbeh”.

Čar Khánh Hoà jing anôk kčưm, ala čar jing anôk tuč dưn yua KPI knuă duh. Phŭn bruă kiă kriê bruă knuă mâo leh hdră êlan ngă KPI hrăm mbĭt hlăm kluôm ala mơ̆ng akŏ thŭn 2026, bi kƀĭn hŏng klei mlih mrô. Êjai klei čih pioh dưi bi mrâo, sa hră mơar ngă êmưt amâo djŏ knŏng mdei hlăm klei hlăk mblang, ƀiădah mâo wăt klei bi klă hlăm măi tĭnh, ba anôk bruă knŭk kna jing anôk bi lông ktưn jăk. Khua phŭn bruă kiă bruă knuă Phạm Thị Thanh Trà mñă ktang:

 “Knŭk kna srăng ba mdah dŭm klei čuăn klă nik kơ bi klă knuă druh, phung mă bruă knŭk kna. Hnơ̆ng čuăn bi klă srăng mkŏ mjing hluê si tur knơ̆ng dưn yua klei mrâo mrang bi mguôp hŏng KPI bruă knŭk kna Việt Nam, nao mbĭt hŏng bruă mă, rơ̆ng kơ klei klă mngač leh anăn klă klơ̆ng. Anei jing tur knơ̆ng čiăng ngă hdră bhiăn, amâo lŏ mâo klei mĭn mâo bruă mă jih klei hdĭp”.

Jing sa jar bi klă mơ̆ng êngao, hnơng mkă boh tŭ dưn bruă knuă – KPI mâo čar Khánh Hoà dôk yua amâo djŏ knŏng bi êdah hnơ̆ng jăk klei mă bruă leh anăn klei gĭr mơ̆ng grăp anôk bruă, grăp čô. Hluê si k’iăng khua Bruă Kƀĭn Ala Nguyễn Thị Thanh, anei jing mnơ̆ng yua mtrŭt mđĭ klei êngiê ti nah gŭ.

“Khánh Hoà jing sa hlăm dŭm anôk nao êlâo hlăm bruă mkŏ mjing KPI čiăng bi klă, mkŏ mjing bruă mă. Klei mngač hlăm bruă hluê ngă dŭm mta phŭn mrâo kơ klei êngiê, mbĭt anăn bi mbŏ dŭm mta phŭn mrâo kơ mnơ̆ng yua ngă klei êngiê hlăm wưng bi mlih mrô”.

Mơ̆ng nah gŭ, truh kơ čar, truh kơ ala čar, hnơ̆ng mrô mkă boh tŭ bruă knuă – Kpi dôk bi luh dŭm êlan mrâo hlăm dhar kreh leh anăn boh tŭ bruă knŭk kna. Hlăm klei hưn mdah kđi čar Klei kƀĭn kluôm bruă Đảng čar Khánh Hoà gưl tal 1, Kpi dưi bi klă jing kdrăp mnơ̆ng phŭn čiăng ngă klei hmăng hmưi, jing klei đĭ kyar ktang mơ̆ng lăn čar, truh thŭn 2030 jing bo mơ̆ng gưl dlông, anôk bruă hiu čhưn ênguê – bruă êa ksĭ tar rŏng lăn. KPI dưi mñă ktang hlăm 3 mta kñăm: Nao êlâo hlăm bruă knuă druh, mkŏ mjing klei mlih hlăm klei bi klă, dăp hnơ̆ng leh anăn yua klei hrăm mbĭt hlăm bruă kđi čar, rơ̆ng kơ klei klă mngač. Anei ăt jing knhuang tal êlâo čiăng kơ bruă knŭk kna Việt Nam giăm hĭn hŏng dŭm hnơ̆ng čuăn mrâo mrang, thơ̆ng kơ bruă leh anăn tŭ dưn./.