Blŭ pŏk klei bi kƀĭn, Khua bruă kƀĭn ala Trần Thanh Mẫn brei thâo, klei kƀĭn tal anei mâo lu mta phŭn yuôm bhăn, djŏ tuôm hŏng bruă duh mkra – ala ƀuôn, răng mgang klei êđăp ênang leh anăn mkŏ mjing bruă kđi čar mơ̆ng lăn čar. Boh nik, gưl kƀĭn tal anei brei klei blŭ mguôp kơ bruă mkra mlih đa đa mta mơ̆ng hdră bhiăn phŭn 2013, djŏ tuôm hŏng bruă bi khuăt phung mă bruă hluê si Hdră mtrŭn mrô 18.

Blŭ bi klă hlăm klei kƀĭn, Khua bruă kƀĭn ala Trần Thanh Mẫn tŭ ư hŏng klei hưn mdah mơ̆ng Khua čihg hră Bruă Kƀĭn Ala. Khua bruă kƀĭn ala Trần Thanh Mẫn mnă kơ knŭk kna leh anăn dŭm anôk bruă djŏ tuôm lŏ dơ̆ng bi mguôp kjăp, gĭr jih ai tiê čiăng bi leh hră mơar, dŭm mta phŭn hlăm gưl kƀĭn, boh nik jing dŭm mta phŭn hưn mdah hŏng Bruă Kƀĭn Ala ksiêm dlăng hluê hdră sa gưl kƀĭn, Hưn mdah hŏng dhar bruă gĭt gai Bruă Kƀĭn Ala hlăm mlan 4/2025, amâo mâo bi kdung truh kơ gưl kƀĭn mlan 5.