Tlam mbruê (25/9-hlue si mmông Việt Nam), hlăm jar nao čhưn klă sĭt ti Bungari, Knăm drông Khua bruă kƀĭn ala Vương Đình Huệ dưi mkŏ mjing leh kdrưh kơăm ti Wăl tač Aleksander Nevski, ti ƀuôn prŏng phŭn Sofia ti gŭ klei gĭt gai mơ̆ng Khua bruă kƀĭn ala Bungari Rosen Zhelyazkov. Leh knăm drông, Khua bruă kƀĭn ala Vương Đình Huệ bi trông hŏng Khua bruă kƀĭn ala Bungari.

 Hlăm klei bi trông, Khua bruă kƀĭn ala Vương Đình Huệ bi mklă, Việt Nam dlăng myuôm nanao leh anăn čang hmăng mđĭ klei bi hgŭm mơ̆ng đưm leh anăn lu mta hŏng Bungari; đăo knang gưl nao čhưn srăng đru mđĭ klei bi hgŭm dua nah êlam hĭn, klă sĭt hĭn, kluôm ênŭm hĭn hlăm dŭm mta bruă. Hlăm ai tiê bi hgŭm leh anăn kpă ênô, dua Khua bruă kƀĭn ala bi trông êlam kơ lu mta bruă, hlăm klei bi hgŭm dua nah leh anăn lu tĭng. Hŏng klei čang hmăng leh anăn klei gĭr ba klei bi hgŭm êlam hĭn, sĭt hĭn leh anăn tŭ dưn hĭn hlăm jih jang bruă, dua tĭng bi tŭ ư dŭm hdră hdră êlan bi hgŭm prŏng.