Hlăm mmông bi tuôm, Khua bruă kƀĭn ala Vương Đình Huệ mñă ktang, 40 thŭn êgao, Êpul hgŭm phung mniê phŭn bruă kahan ksiêm amâo mâo mdei đĭ kyar kơ djăp mta, mơ̆ng bruă mkŏ mjing, hdră ngă bruă truh kơ ênoh phung hgŭm, hnơ̆ng tŭ jăk leh anăn mđĭ kyar dŭm mta hdră bruă mơ̆ng phung mniê. Êpul jing wăl anôk čiăng kơ grăp čô mjuăt pô, bi klă pô, leh anăn jing boh kdrŭt čiăng kơ phung amai adei gĭr ktưn leh anăn amâo mâo mdei đĭ kyar hŏng dŭm hdră bruă amâo djŏ knŏng hing ang hlăm yang ƀuôn, ƀiădah lŏ mâo dŭm gru kruăk jăk siam kơ rup phung mniê kahan ksiêm yang ƀuôn msĕ si: Hdră “3 thâo mbruă”, hdră “Phung mniê thâo bruă ala čar, thâo bruă pưk sang”…

Mơ̆ng dŭm hdră anăn, mâo lu klei bi hmô phung mniê kahan ksiêm hjŏng ktang, lu phung amai adei jing phung thơ̆ng kơ bruă, phung kreh knhâo, mâo kơhưm hlăm dhar bruă leh anăn yang ƀuôn. Ênoh phung knuă druh mniê dưi tiŏ nao păn ngă khua gĭt gai ƀrư̆ hruê ƀrư̆ lu. Khua bruă kƀĭn ala lač, ti anăp dŭm klei čuăn đĭ kyar mrâo mơ̆ng ala čar, Đảng, knŭk kna drei lŏ mâo hĭn klei uêñ mĭn, mđĭ kyar kluôm ênŭm leh anăn êlam hĭn hŏng phung mniê ala čar drei, klă anăp jing bruă mtrŭt mjhar phung mniê, kyua mta kñăm mtăp mđơr, yâo mơak leh anăn mrâo mrang. Khua bruă kƀĭn ala mtă kơ phung knuă druh, phung mniê kahan ksiêm yang buôn lŏ dơ̆ng gĭr ktưn mjuăt pô, hluê hriăm, mbruă hlăm klei mă bruă, mgaih msir dŭm klei dleh dlan, klei dleh kpăk kyua boh sĭt êkei mniê.