Khua bruă kƀĭn ala Vương Đình Huệ bi êdah klei m’ak leh hmư̆ asăp jak iêu mơ̆ng Khua bruă kƀĭn ala nah gŭ Puan Maharani hriê čhưn klă klơ̆ng Indonesia, nao ti Klei bi kƀĭn Êpul hgŭm bruă kƀĭn ala dŭm ala čar krĭng Ngŏ Dhŭng Asi tal 44, nao čhưn ƀuôn prŏng Jakarta jăk siam.

Bi mklă klei bi mjĕ plah wah dua ala čar dôk đĭ kyar jăk siam, Khua bruă kƀĭn ala bi mklăm gưl hiu čhưn tal anei kñăm mđĭ hĭn klei bi mjĕ mơ̆ng dua ala čar hlăm djăp mta bruă, mâo bruă Đảng, bruă kƀĭn ala, knŭk kna, alŭ wăl lehanăn mjĕ mjuk mnuih ƀuôn sang. Khua bruă kƀĭn ala brei thâo, anei jing gưl nao čhưn kơ Indonesua tal êlâo mơ̆ng Khua bruă kƀĭn ala, ñu bi êdah klei bi kngăr ti anăp klei đĭ kyar mơ̆ng ƀuôn prŏng phŭn Jakarta – ƀuôn prŏng mâo knŏng 3% ênoh mnuih ƀiădah đru mguôp truh 20% GDP kơ ala čar Indonesia. Khua bruă kƀĭn ala čang hmăng ƀuôn prŏng phŭn dua ala čar srăng mđĭ hĭn klei bi hgŭm, bi trông klei thâo hlăm hdră mđĭ kyar, boh nik plah wah ƀuôn prŏng phŭn Hà Nội-Jakarta tĭng hnưm srăng mâo êlan phiơr kpă./.