Hlăm mmông mă bruă, pô bi ala mơ̆ng Dhar bruă kƀĭn ala, dŭm phŭn, dhar bruă djŏ tuôm yap yuôm bhăn boh tŭ dưn mơ̆ng Hà Nội dưi mâo leh hlăm wưng êgao. Leh 15 thŭn pŏk phai, ƀuôn prŏng mâo lu klei mlih. Hà Nội mâo leh dŭm boh tŭ dưn yuôm bhăn, GRDP đĭ ktang, hnư knŭk kna hrui wĭt ti ƀuôn prŏng êgao hnơ̆ng đăo knăl.

Blŭ hlăm mmông mă bruă, Khua bruă kƀĭn ala Vương Đình Huệ lač, ƀuôn prŏng Hà Nội mâo leh klei gĭr ktưn hluê ngă jăk dŭm hdră mtrŭn mơ̆ng Đảng, mơ̆ng ƀuôn prŏng, dŭm hdră mtrŭn mơ̆ng gưl dlông, bruă Kƀĭn ala, knŭk kna leh anăn dưi mâo boh tŭ dưn kluôm dhuôm, yuôm bhăn. Hlăm wưng kơ anăp, Khua bruă kƀĭn ala mtă kơ Hà Nội lŏ dơ̆ng ksiêm dlăng bruă klam krah wưng păn bruă, čiăng mâo klei đĭ kyar hmar, kdlưn hĭn, ksiêm dlăng ai dưi bi leh dŭm hnơ̆ng čuăn mđĭ kyar bruă duh mkra ala ƀuôn hlăm wưng păn bruă, ngă jăk hĭn bruă duh bi liê, dŭm hdră čuăl mkă mâo leh, bi klă phŭn agha ngă kơ ai dưi ƀuôn prŏng toh hroh mkă hŏng hnơ̆ng kah knar hlăm kluôm ala.