Gưl akŏ yan mnga, thŭn mrâo leh anăn bi hdơr 93 thŭn Hruê mkŏ mjing Đảng Cộng sản Việt Nam 3/2, aguah mbruê 30/1, ti alŭ Trường Sơn, să Chân Sơn, kdriêk Yên Sơn, čar Tuyên Quang - anôk phŭn mtlaih êngiê, anôk phŭn bi blah, Khua bruă kƀĭn ala Vương Đình Huệ nao hlăm knăm pŏk ngă klei bi lông ktưn leh anăn “Tết pla ana kyâo hdơr nanao kơ Awa Hồ” yan mnga Qúy Mão 2023.

Khua bruă kƀĭn ala bi mklă, Yan mnga Quý Mão 2023 lŏ dơ̆ng jing thŭn Tết pla ana kyâo dưi mphŭn mkŏ mjing mơ̆ng Yan mnga Canh Tý bŏ 63 thŭn êlâo hlue si klei jak iêô mơ̆ng Khua gĭt gai Hồ Chí Minh. Hŏng ai êwa mrâo, klei gĭr mrâo, hdră ngă mrâo, Khua bruă kƀĭn ala čang hmăng “Tết pla ana kyâo hdơr nanao kơ Awa Hồ” Yan mnga Quý Mão 2023 ti čar Tuyên Quang dưi mâo lu klei tŭ dưn jăk siam hĭn, đru mkŏ mjing ala čar Việt Nam mtah, đĭ kyar kjăp, msĕ si klei Khua gĭt gai Hồ Chí Minh čang hmăng: “Yan mnga jing Tết pla ana kyâo đru kơ ala čar ƀrư̆ hruê ƀrư̆ jăk siam”.