Khua bruă kƀĭn ala Vương Đình Huệ yap yuôm bhăn bruă klam mơ̆ng pô bi ala hlăm wưng êgao mâo lu klei đru mguôp kñăm mtrŭt mđĭ hĭn klei mjĕ giăm knhuah gru, bi mguôp kluôm dhuôm, mâo mă hjăn dlông rŏng lăn leh anăn klei mjĕ giăm plah wah 2 Bruă kƀĭn ala. Boh nik, êngao kơ hdră bi tuôm grăp tuôr plah wah Phŭn bruă kđi čar leh anăn klei bi kƀĭn grăp tuôr mơ̆ng dhar bruă bi mguôp knŭk kna 2 ala čar, mrâo anei, Klei bi tuôm gưl dlông Việt Nam – Campuchia – Lào plah wah khua gĭt gai 3 Đảng dưi mkŏ mjing tŭ jing.

Êngao kơnăn, dua tĭng mâo lu hdră mrâo dưi mkŏ mjing. Hlăm anăn mâo hdră plah wah tlâo čô Khua bruă kƀĭn ala Campuchia-Lào-Việt Nam srăng dưi mkŏ mjing klei kƀĭn trông gưl dlông bruă kƀĭn ala CLV gưl tal êlâo ti Lào ti knhal jih thŭn anei. Ƀri wưng anei, khua bruă kƀĭn ala lač jăk kơ Bruă kƀĭn ala Lào tiŏ nao pô bi ala hgŭm hlăm klei kƀĭn trông phung khua êmua mda asei tar rŏng lăn gưl tal 9 mơ̆ng bruă Kƀĭn ala Việt Nam mkŏ mjing, bi êdah klei hơ̆k mơak êjai Bruă kƀĭn ala Lào jing ala čar khua gĭt gai AIPA 2024 hrăm mbĭt leh hŏng khua kiă kriê AIPA bi tuôm hŏng phung khua êmua mda asei AIPA hlăm klei kƀĭn trông mrâo êgao.