Hưn mdah hŏng êpul ngă bruă, khua gĭt gai čar Cao Bằng brei thâo: Thŭn 2022, klei đĭ kyar mơ̆ng čar mâo 5,04%, hnơ̆ng gŏ sang ƀun ƀin hrŏ 4,29%, bruă lĭng kahan, klei êđăp ênang yang ƀuôn ti alŭ wăl dưi rơ̆ng kjăp. Bruă mkŏ mjing Đảng leh anăn bruă kđi čar dưi bi kjăp. Thŭn 2023, čar Cao Bằng lŏ dơ̆ng mtrŭt mđĭ hdră êlan ruh mgaih klei dleh dlan hlăm bruă mkra mjing, mnia mblei, mtrŭt mđĭ klei mlih mrâo hră mơar knŭk kna, bi hơĭt wăl duh bi liê mnia mblei leh anăn kñăm kơ đa đa bruă mkŏ mkra, hdră mkăp kñăm, hlăm anăn mâo êlan dơ̆ng pral Đồng Đăng – Trà Lĩnh…

Khua êpul kiă kriê bruă knuă gưl dlông Phan Đình Trạc mtă kơ čar Cao Bằng čiăng mâo hdră êlan ruh mgaih dŭm anôk dleh kpăk, boh nik jing hlăm êlan klông. Kñăm kơ bruă mđĭ hnơ̆ng tŭ jăk mnuih mă bruă, mtrŭt mđĭ klei brei čan duh bi liê bruă knŭk kna leh anăn iêo jak klei duh bi liê, boh nik jing duh bi liê mđĭ kyar ƀăng jang knông lăn, mđĭ kyar bruă hiu čhưn ênguê, lŏ dơ̆ng mđĭ boh tŭ dưn klei ngă bruă mơ̆ng dŭm anôk bruă kiă kriê bruă knuă, ksiêm dlăng, ktuê dlăng, mtrŭt mjhar hluê ngă jăk dŭm klei čuăn kơ bruă gang mkhư̆ klei ƀơ̆ng ngăn, hdră ƀuah mkra dŭm klei ƀơ̆ng ngăn, klei amâo mâo jăk, hluê ngă jăk bruă mkra mlih klei bhiăn.