Să Đưng K’Nơ̆, kdriêk Lạc Dương, čar Lâm Đồng mâo êbeh 90% mnuih ƀuôn sang jing mnuih djuê ƀiă. Mbĭt hŏng klei akâo knŭk kna čiăng hnưm bi leh êlan dơ̆ng Ngŏ Trường Sơn, êlan dơ̆ng mrô 722 găn alŭ wăl čiăng mtrŭt mđĭ bruă mkŏ klei mnia mblei, duh bi liê bruă mkŏ mkra, boh nik jing pui kmlă 3 aruă klei rơ̆ng kơ bruă mkra mjing leh anăn klei hdĭp mnuih ƀuôn sang, mtrŭt mđĭ klei đĭ kyar bruă duh mkra ala ƀuôn… Phung bi ala tinei lŏ uêñ mĭn kơ bruă răng mgang dliê leh anăn dŭm hdră êlan bruă hlăm dliê čiăng mđĭ hnư hrui wĭt, bi hơĭt klei hdĭp mda.

Blŭ hrăm hlăm mmông bi tuôm, Khua êpul kiă kriê bruă knuă gưl dlông Phan Đình Trạc lač klei akâo mơ̆ng mnuih ƀuôn sang jing năng êdi. Êpul bi ala Bruă Kƀĭn Ala čar Lâm Đồng srăng hưn mdah hŏng dŭm anôk bruă djŏ tuôm ksiêm dlăng, mgaih msir, mbĭt anăn ksiêm duah thiăm dŭm hdră êlan rơ̆ng hdră duh ƀơ̆ng kơ mnuih ƀuôn sang hdĭp knang kơ dliê. Wưng anei, Êpul bi ala Bruă Kƀĭn Ala čar Lâm Đồng mđup brei 20 hnư mnơ̆ng kơ dŭm gŏ sang knŭk kna dlăng ba, gŏ sang dleh dlan, ƀun ƀin.