Bruă dôk Tač êdeh phiơr prŏng Long Thành jing leh tač êdeh phiơr prŏng hĭn mơ̆ng kluôm ala mơ̆ng êlâo kơ ară anei. Ară anei hnơ̆ng đĭ kyar rŭ mdơ̆ng mơ̆ng dŭm mta bruă klă sĭt dôk mâo Knơ̆ng bruă Tač êdeh phiơr prŏng Việt Nam mđĭ ktang hlue ngă djŏ si klei Knŭk kna gĭt gai rơ̆ng hdră kñăm bi leh ba yua êlâo hruê 2/9/2026. Anei jing gưl tal 5, Khua knŭk kna Phạm Minh Chính ksiêm dlăng anôk dôk mkra tač êdeh phiơr prŏng Long Thành.

Ti anôk bruă, Khua knŭk kna nao ksiêm dlăng bruă rŭ mdơ̆ng dŭm hdră bruă đơ điêt. Hdră kñăm knhal jih thŭn 2025 jih jang hdră bruă brei ngă leh, leh anăn knhal jih mlan 2 thŭn 2026 brei dưi ba yua tač êdeh phiơr. Khua knŭk kna mtă brei rơ̆ng hnơ̆ng ngă hdră bruă, hnơ̆ng jăk, êđăp ênang mă bruă, brei “amâo uêñ kơ adiê hjan mđiă, amâo huĭ kơ angĭn êbŭ”, “hnêč mmông huă ƀơ̆ng đih pĭt”, ngă bruă wăt hlăm hruê mdei têt čiăng dưi ngă hdră kñăm .