Hlăm dŭm anôk bruă nao čuă, êpul hmư̆ klei hưn mdah kơ bruă mkra mjing, mnia mblei mơ̆ng dŭm knơ̆ng bruă. Phung khua gĭt gai bi myuôm dŭm boh tŭ dưn dưi mâo hlăm bruă bi mguôp plah wah bruă klam bruă duh mkra leh anăn bruă lĭng kahan, ăt msĕ mơh bruă mkra mjing mơ̆ng dŭm anôk bruă. Boh nik, dŭm êpul ăt bi êdah klei hmăng hmưi dŭm knơ̆ng bruă lŏ pŏk mlar klei mkra mjing, mđĭ hnơ̆ng tŭ jăk krĭng pla mjing, bi lu jơr mnơ̆ng dhơ̆ng, pŏk mlar anôk mnia mblei leh anăn mđĭ hnư hrui wĭt kơ mnuih mă bruă.

Khua gĭt gai čar Dak Lak mñă klă srăng mkŏ mjing klei găl hlăm hdră bhiăn čiăng kơ dŭm knơ̆ng bruă đĭ kyar. Blŭ hrăm ti knơ̆ng bruă ơ Bia Sài Gòn – kwar krah, Nguyễn Tuấn Hà, k’iăng khua bruă sang čư̆ êa čar Dak Lak mñă klă mta kñăm mơ̆ng čar hlăm wưng kơ anăp jing gĭr mđĭ 2 ênoh mrô hluê si klei čuăn mơ̆ng Khua knŭk kna. Čiăng dưi ngă bruă anei, čar čiăng mâo klei hrăm mbĭt leh anăn klei gĭr mơ̆ng dŭm knơ̆ng ngă hdră êlan mđĭ kyar bruă duh mkra ala ƀuôn dưi jao.