Khua gĭt gai Đảng Nguyễn Phú Trọng lač Việt Nam dôk tui tiŏ hdră êlan êngiê, čŏng pô, tui duah klei êđăp ênang, hgŭm mbĭt, hgŭm bruă lehanăn mđĭ kyar hŏng lu tĭng, jih ai tiê bi mguôp hŏng jih jang lăn čar mah jiăng, jing pô bi hgŭm năng đăo knang, mâo klei đua klam hŏng jih jang lăn čar tar rŏng lăn. Khua gĭt gai Đảng brei thâo: Việt Nam srăng lŏ mđĭ hĭn klei bi hgŭm hŏng dŭm ala čar mâo nanao klei bi blŭ hrăm, bi trông tui duah klei êđăp ênang. Việt Nam bi mni kơ Mi sa ai hŏng jih bruă phŭn mơ̆ng dŭm ala čar hlăm ASEAN, mbĭt hŏng dŭm ala čar hlăm ASEAN mkŏ mjing hdră êlan kơ ASEAN kơ klei krĭng ksĭ India – Pacific.

Khua mil čhil Mi Joe Biden lač Việt Nam jing ala čar hgŭm yuôm bhăn, sa ai hŏng sa Việt Nam “êngiê, čŏng pô mđĭ kyar lehanăn mdrŏng sah” Lŏ mñă kơ klei mpŭ kơ klei dưi êngiê, klei kluôm ênŭm lăn čar lehanăn kơ klei bhiăn bruă kđi čar ti Việt Nam.  Ăt hlăm klei bi blŭ hrăm anei mâo bơ̆k bâo mơh kơ dŭm boh klei dôk găn dlông rŏng lăn, kơ klei bi mlih yan adiê, klei krŭ wĭt bruă duh mkra ala ƀuôn, klei hgŭm kơ klei ngă phŭn êngiê anak mnuih./.