Anei jing klei bi kƀĭn tal êlâo leh Anôk bruă gĭt gai dưi mkŏ mjing, bi êdah ai tiê mjêč, kjăp, kreh knhâo, ngă mtam bruă klam prŏng mơ̆ng Đảng hlăm wưng mrâo. Klah čŭn mmông mă bruă, Khua gĭt gai Đảng Tô Lâm lač klă klei mĭn, drei dôk mprăp kơ sa  bi knăl hƀuê ênuk yuôm bhăn anăn jing bi hdơr 100 thŭn lăn čar ti gŭ klei gĭt gai mơ̆ng Đảng Cộng sản Việt Nam leh anăn 40 thŭn hlue nga Hdră mtrŭn mkŏ mjing lăn čar hlăm ênuk giăm truh yang ƀuôn ngă phŭn.

Ksiêm dlăng 100 thŭn jing gưl čiăng kơ drei lŏ dlăng jih jang êlan Đảng gĭt gai djuê ana: mơ̆ng klei bi blah sua mă klei êngiê, hluh lir lăn čar, truh kơ mkŏ mjing leh anăn răng mgang čar kwar yang ƀuôn ngă phŭn; klei bhiăn hdră kčah kƀĭn truh kơ klei mlih mrâo kluôm; mơ̆ng sa lăn čar ƀun ƀin, kthŭl mluk jing sa ala čar mâo kơhưm ƀrư̆ jăk dlông rŏng lăn. Anei jing klei găl čiăng bi klă hĭn gru hmô đĭ kyar, dŭm boh tŭ mâo leh, dŭm klei kƀah, klei awăt, mta phŭn leh anăn klei hriăm. Yuôm bhăn hĭn jing mprăp tur knơ̆ng hlak mblang leh anăn boh sĭt kơ dŭm hdră êlan kluôm hlăm wưng đĭ kyar mrâo, mđing kơ thŭn 2045 leh anăn kbưi hĭn jing tă hdră gĭt gai đĭ kyar ala čar truh thŭn 2130.