Hlăm klei blŭ hrăm, 2 čô khua gĭt gai mñă ktang, anei jing bruă ngă phŭn kčưm tŭ drông klei bi hdơr 50 thŭn mkŏ mjing klei mjĕ giăm Việt Nam – Japon. Hluê anăn, 2 čô khua gĭt gai bi tŭ ư sa ai hlăm bruă mkŏ mjing dŭm mta bruă bi hdơr kñăm mkŏ mjing klei bi mguôp, mtrŭt mđĭ klei mjĕ giăm bi mguôp hlăm djăp mta bruă, ba klei mjĕ giăm 2 ala čar đĭ ti hnơ̆ng mrâo, ba wĭt boh tŭ dưn klă klơ̆ng kơ mnuih ƀuôn sang 2 ala čar.

Khua gĭt gai Đảng Nguyễn Phú Trọng mñă klă, Việt Nam tui tiŏ nanao hdră bruă hŏng tač êngao êngiê, čŏng pô, êđăp ênang, bi hgŭm, bi mguôp leh anăn đĭ kyar, bi lu jơr, lu tĭng klei mjĕ giăm hŏng tač êngao, čŏng pô leh anăn hur har ñŭ kma hŏng tar rŏng lăn. Việt Nam jing ƀĭng hgŭm đăo knang, leh anăn jing pô hgŭm hur har, mâo bruă klam hlăm êpul êya tar rŏng lăn. Hlăm anăn japon jing ƀĭng hgŭm mrô 1 mơ̆ng Việt Nam.