Hlăm mmông tŭ drông, Khua gĭt gai Đảng Nguyễn Phú Trọng mñă klă Việt Nam mâo nanao klei sa ai hlăm bruă mkŏ mjing leh anăn đĭ kyar lăn čar Campuchia leh anăn đăo knang Campuchia srăng lŏ dơ̆ng mâo dŭm boh tŭ dưn mrâo, prŏng leh anăn kluôm hĭn hlăm bruă hluê ngă hdră mtrŭn mơ̆ng Đảng CPP wưng thŭn 2023 – 2028 leh anăn hdră êlan mơ̆ng knŭk kna gưl 7 bi êdah leh. Khua gĭt gai Đảng mñă kơ 2 tĭng hluê ngă tŭ dưn mta phŭn klei bi tuôm plah wah khua gĭt gai gưl dlông 2 Đảng leh anăn klei bi tuôm plah 3 čô khua gĭt gai mơ̆ng 3 Đảng Việt Nam-Campuchia-Lào.

Lŏ dơ̆ng mlih mrâo hdră êlan bi mguôp plah wah 2 đảng kñăm bi djăp ênŭm klei čiăng hlăm wưng mrâo. Hluê anăn, lŏ dlăng kơ klei mjĕ giăm bruă kđi čar jing kmeh gơ̆ng kơ klei mjĕ giăm dua ala čar, bi kjăp klei bi mguôp bruă lĭng kahan, klei êđăp ênang, mđĭ hĭn klei bi mguôp hlăm bruă hŏng tač êngao, mkŏ mjing klei kdlưn hĭn, mđĭ boh tŭ klei bi mguôp bruă duh mkra, dhar kreh, mtô bi hriăm leh anăn mtrŭt mđĭ klei mjĕ êrô mnuih ƀuôn sang.