Êpul gĭt gai mñă klă, hlăm 6 mlan akŏ thŭn 2023 leh anăn mơ̆ng akŏ wưng Klei kƀĭn kluôm bruă Đảng tal 13 truh kơ ară anei, klei ngă bruă mơ̆ng êpul gĭt gai lơ̆ dơ̆ng mlih mrâo kơ mta phŭn leh anăn hdră ngă bruă, êdah hĭn jing lu hdră êlan dưi hluê ngă ktang phĭt, mkŏ mjing boh tŭ dưn klă nik hlăm bruă gang mkhư̆ klei ƀơ̆ng ngăn, klei amâo mâo djŏ.

Dŭm mlan knhal jih thŭn 2023, Êpul gĭt gai mtă kơ dŭm gưl bruă Đảng, êpul bruă Đảng, anôk bruă djŏ tuôm kñăm gĭt gai, ktrâo lač, hluê ngă tŭ dưn dŭm bruă klam hluê hdră ngă bruă thŭn 2023 mơ̆ng Êpul gĭt gai leh anăn dŭm klei bi klă mơ̆ng Khua gĭt gai Đảng, Khua êpul gĭt gai, hlăm anăn kñăm kơ dŭm bruă klam msĕ si gĭt gai mtrŭt mđĭ bruă mkŏ mjing, bi kluôm hdră gang mkhư̆ klei ƀơ̆ng ngăn, klei amâo mâo jăk. Mta knăm jing hnưm bi kluôm hdră ksiêm dlăng klei dưi, gang mkhư̆ klei ƀơ̆ng ngăn hlăm dŭm mta bruă ênưih mâo klei ƀơ̆ng ngăn, klei amâo mâo djŏ, kơ bruă răng mgang pô kčŭt hưn, mkăp brei klei hưn kơ klei ƀơ̆ng ngăn, klei amâo mâo djŏ. Gĭt gai mđĭ hĭn klei ksiêm dlăng, ksiêm duah, tĭng mkă dŭm mta bruă ênưih mâo klei ƀơ̆ng ngă leh anăn klei amâo mâo jăk, mjêč bi leh bruă ksiêm duah hluê si hdră kčah mơ̆ng Êpul gĭt gai.