Ƀăng jang knông lăn prŏng Hữu Nghị dôk ti êlan dơ̆ng mrô 1A, kbưi hŏng ƀuôn prŏng Lạng Sơn 17 km nao phă dưr, kbưi hŏng Hà Nội 171 km nao phă ngŏ dưr. Anôk mkŏ mjing lu bruă mŭt kbiă plah wah Việt Nam leh anăn China. Ti ƀăng jang knông lăn mâo gơ̆ng knông lăn mrô 1116 mâo rup hla čhiăm gru ala čar yang ƀuôn ngă phŭn Việt Nam, anei jing akŏ êlan dơ̆ng mrô 1A mkŏ Lạng Sơn hŏng Cà Mau. Ƀăng jang knông lăn prŏng Hữu Nghị jing anôk yuôm bhăn hlăm êlan dar bruă duh mkra, đru mtrŭt mđĭ klei đĭ kyar bruă duh mkra plah wah Việt Nam leh anăn China mbĭt hŏng dŭm lăn čar hlăm ASEAN. Êlan bruă duh mkra phŭn: Nam Ninh - Lạng Sơn - Hà Nội - Hải Phòng hluê si klei kuôl lă plah wah khua gĭt gai gưl dlông 2 lăn čar…

Tinei, Khua gĭt gai Đảng Nguyễn Phú Trọng mâo leh klei čuă êmuh leh anăn mđup brei hnư mnơ̆ng kơ êpul êya mă bruă ti ƀăng jang knông lăn. Wưng anei, Khua gĭt gai Đảng Nguyễn Phú Trọng mâo klei bi trông bhiâo hŏng Pô bi ala China ti Việt Nam Hung Ba. Khua gĭt gai Đảng Nguyễn Phú Trọng mñă, čar Lạng Sơn leh anăn êpul bruă ti Ƀăng jang knông lăn prŏng Hữu Nghị lŏ dơ̆ng bi lar, đru mguôp hur har hĭn, đru mtrŭt mđĭ klei mjĕ giăm, bi mguôp plah wah Việt Nam – China ƀrư̆ hruê ƀrư̆ đĭ kyar. Êlâo kơnăn, akŏ mmông tlam mbruê, Khua gĭt gai Đảng Nguyễn Phú Trọng mbĭt hŏng êpul ngă bruă nao čuă leh anăn mđup brei hnư mnơ̆ng kơ gŏ sang Nguyễn Xuân Khoát, knuă druh bruă cách mạng leh anăn gŏ sang aduôn Bạch Thị Khôi knuă druh phŭn bruă krŭ kdơ̆ng ti ƀuôn prŏng Lạng Sơn.