Bi ala kơ khua gĭt gai Đảng leh anăn knŭk kna, Khua gĭt gai Đảng Nguyễn Phú Trọng pah mni leh anăn lač jăk kyua dŭm klei đru mguôp prŏng prĭn mơ̆ng êpul êya phung čih klei yăl dliê mơ̆ng lăn čar, mơ̆ng Êpul hgŭm phung čih klei yăl dliê Việt Nam hlăm 75 thŭn êgao. Mñă ktang kơhưm mơ̆ng bruă čih klei yăl dliê, Khua gĭt gai Đảng Nguyễn Phú Trọng mtă kơ dŭm gưl bruă Đảng, bruă sang čư êa mơ̆ng gưl dlông truh kơ alŭ wăl čiăng thâo săng êlam hĭn kơ bruă klam, kơhưm yuôm bhăn mơ̆ng dhar kreh, klei čih yăl dliê hlăm bruă mlih mrâo, mkŏ mjing leh anăn răng mgang lăn čar, mâo nanao klei mđĭ ai, mtrŭt mjhar, mkŏ mjing klei găl hĭn kơ dŭm mta bruă dhar kreh, klei čih yăl dliê đĭ kyar. Khua gĭt gai Đảng Nguyễn Phú Trọng hmăng hmưi leh anăn đăo knang, bruă čih klei yăl dliê cách mạng Việt Nam mbĭt hŏng phung čih klei yăl dliê lŏ dơ̆ng bi lar boh tŭ mơ̆ng klei yăl dliê hlăm 75 thŭn êgao, srăng dưi găn hgao jih klei dleh dlan, klei lông dlăng čiăng mâo lu klei čih năng hŏng anak mnuih leh anăn lăn čar Việt Nam êtuh êbâo klei khăp čiăng, mâo ênŭm klei hmăng hmưi mơ̆ng mnuih ƀuôn sang./.