Ƀri wưng bi hdơr 93 thŭn hruê mkŏ mjing Đảng cộng sảng Việt Nam (03/02/1930-03/02/2023), aguah mbruê 6/2 ti anôk bruă Đảng gưl dlông, ti gŭ klei gĭt gai mơ̆ng Khua gĭt gai Đảng Nguyễn Phú Trọng, Phŭn bruă kđi čar, Êpul khua bruă Đảng mkŏ mjing klei bi tuôm akŏ yan mnga Quý Mão thŭn 2023 hŏng phung khua gĭt gai gưl dlông hđăp mơ̆ng Đảng, knŭk kna, mặt trận čar kwar Việt Nam hlăm dŭm wưng.

Blŭ hlăm mmông bi tuôm, Khua gĭt gai Đảng Nguyễn Phú Trọng mñă klă, hlăm wưng dôk mâo lu klei dleh dlan, klei lông dlăng, khua gĭt gai Đảng, knŭk kna mâo nanao klei bi mguôp, sa ai, mbruă, čiăng mâo dŭm hdră êlan djŏ guôp, djŏ hruê mmông čiăng gĭt gai, ktrâo lač kluôm Đảng, jih jang mnuih ƀuôn sang leh anăn lĭng kahan dưi mâo lu boh tŭ dưn yuôm bhăn, kluôm ênŭm dŭm mta kñăm, bruă klam mâo leh. Khua gĭt gai Đảng Nguyễn Phú Trọng bi êdah klei hmăng hmưi, hlăm wưng kơnăp, phung khua gĭt gai hđăp mơ̆ng Đảng leh anăn knŭk kna hŏng ai tiê leh anăn dŭm klei hriăm yuôm bhăn mơ̆ng pô, hluê si klei găl grăp čô srăng lŏ dơ̆ng đru mguôp hŏng bruă cách mạng mơ̆ng Đảng, knŭk kna leh anăn mnuih ƀuôn sang.