Khua gĭt gai Đảng bi êdah klei hơ̆k mơak kơ klei mjĕ giăm, bi mguôp kluôm ênŭm Việt Nam – Lào ƀrư̆ hruê ƀrư̆ đĭ kyar, nao êlam hĭn, klă klơ̆ng leh anăn mâo boh tŭ dưn hlăm djăp mta bruă, đru mguôp rơ̆ng klei êđăp ênang bruă kđi čar, bruă lĭng kahan leh anăn mđĭ kyar bruă duh mkra – ala ƀuôn mơ̆ng grăp ala čar. Hlăm wưng kơ anăp, 2 Đảng, 2 ala čar čiăng lŏ mđĭ hĭn boh tŭ klei bi mguôp čiăng bi djăp ênŭm hnơ̆ng čoh čuăn mrâo, hrăm mbĭt kah mbah, sa ai hdơ̆ng pô, găn hgao klei dleh dlan.

Khua gĭt gai Đảng Nguyễn Phú Trọng mñă kơ adŭ bruă gưl dlông Đảng lŏ dơ̆ng bi lar knhuah gru pô, bi mguôp kjăp, bi trông kơ dŭm klei hlăk mblang leh anăn boh sĭt, klei hriăm, bi đru hdơ̆ng pô hlăm dŭm hdră êlan, hluê ngă tŭ dưn klei kuôl kă plah wah 2 adŭ bruă gưl dlông mơ̆ng 2 Đảng leh anăn pla wah khua gĭt gai gưl dlông mơ̆ng 2 Đảng, hluê ngă tŭ jing hdră mtrŭn klei kƀĭn mơ̆ng grăp Đảng.