Bi ala kơ bruă Đảng gưl dlông, Khua gĭt gai Đảng Tô Lâm hưn kơ đa đa hdră êlan čiăng mâo mta knăm “bi hơĭt yang ƀuôn, mđĭ kyar bruă duh mkra, mđĭ hnơ̆ng klei hdĭp mnuih ƀuôn sang”, truh thŭn 2030, ala čar drei jing ala čar hlăk đĭ kyar, mâo bruă tuh tia mrâo mrang, truh thŭn 2045 jing ala čar đĭ kyar, mâo hnư hrui wĭt lu.

Khua gĭt gai Đảng mñă klă, Đảng leh anăn knŭk kna kñăm kơ dŭm hdră êlan rơ̆ng kơ klei êđăp ênang, hơĭt kjăp čiăng mđĭ kyar lăn čar. Đảng drei amâo mâo boh tŭ dưn mkăn êngao kơ boh tŭ dưn kơ mnuih ƀuôn sang, mnuih ƀuôn sang jing mta kñăm, jing phŭng mơ̆ng grăp hdră êlan mơ̆ng Đảng, grăp klei gĭr mơ̆ng Đảng, knŭk kna, wăt bruă kđi čar knŏng mâo boh tŭ dưn êjai mnuih ƀuôn sang mâo klei hdĭp trei mđao, yâo mơak. Kyuanăn yơh, Đảng, knŭk kna srăng ngă djăp hdră êlan kriê dlăng, mđĭ hnơ̆ng klei hdĭp mnuih ƀuôn sang, boh nik jing dŭm djuê ana krĭng taih kbưi, krĭng knông lăn, plao ksĭ, krĭng krŭ kdơ̆ng phŭn, dŭm krĭng hdră êlan, krĭng mnuih ƀuôn sang mâo klei đăo. Hluê ngă jăk hdră êlan bi hơĭt yang ƀuôn, hdră êlan hŏng phung mâo ai đru, ngă hdră amâo mâo mă prăk hriăm hră hŏng grăp gưl, gĭr bi leh bruă msir lăm sang dôk êjai hlăm lăn čar, kñăm mđĭ kyar bruă mdrao mgŭn, kriê dlăng klei suaih pral mnuih ƀuôn sang, anăp truh amâo mâo mă prăk mdrao mgŭn kơ jih jang mnuih ƀuôn sang, čiăng kơ grăp čô mnuih Việt Nam klă sĭt mâo klei hdĭp trei mđao, yâo mơak.