Lŏ dơ̆ng dŭm bruă hlăm hdră nao čhưn gưl knŭk kna truh ti Indonesia lehanăn nao čuă dlăng Anôk dlăng bruă ASEAN, aguah 10/3 mbruê, Khua gĭt gai Đảng Tô Lâm nao ti Klei bi blŭ hrăm anôk bruă duh mkra gưl dlông ƀri bi hdơr 70 thŭn Hruê mkŏ mjing klei bi mjĕ Việt Nam-Indonesia hŏng akŏ "Việt Nam lehanăn Indonesia: Klei bi mjĕ kyua klei đĭ kyar lehanăn sah mdrŏng”.

Blŭ ti knăm anei, Khua gĭt gai Đảng Tô Lâm bi mni kơ hdră bi hgŭm duh bi liê, mnia mblei tŭ dưn plah wah Việt Nam - Indonesia hlăm wưng êgao lehanăn čang hmăng lŏ mâo klei đăo knang, sa ai, đru mơ̆ng Knŭk kna, dŭm anôk bruă, êpul êya bruă duh mkra Indonesia hlăm wưng ti anăp. Khua gĭt gai Đảng mtă, phung duh bi luê dua ala čar srăng ksiêm dlăng, pŏk mlar hdră duh bi liê hlăm dŭm anôk bruă msĕ si: Kreh knhâo, kdrăp mrâo, mlih mrâo, ksiêm hriăm lehanăn mđĭ kyar, bruă mkra chíp bán dẫn, klei thâo anak mnuih Ai, Internet djăp mta ra mnơ̆ng (IOT); năng lượng mrâo (msĕ si hydrogen), bruă ngăn prăk, kdrăp sinh học, bruă mdrao mgŭn… Viêt Nam ƀrư̆ hruê ƀrư̆ bi mklă bruă klam phŭn hlăm hdră bi mguôp, jak iêu klei duh bi liê mơ̆ng tar rŏng lăn, boh nik hlăm bruă điện tử, kreh knhâo, kdrăp mrâo, mlih mrâo, ksiêm hriăm lehanăn mkra chíp bán dẫn, bruă duh mkra mrô, duh mkra mtah…