Ti anôk bi tuôm, Khua gĭt gai Đảng Tô Lâm mñă Việt Nam yap yuôm lehanăn hmăng hmưi mâo klei mjĕ mgiăm kluôm ênŭm plah wah dua ala čar, bi năng hŏng klei bi mguôp mrâo. Khua gĭt gai Đảng hơêč hmưi kơ Singapore kơ dŭm boh tŭ dưn leh mâo hlăm djăp mta, jing klei bi hmô mngač kơ dŭm ala čar hgŭm Ngŏ dhŭng Asi.

Dua čô khua kiă kriê mâo leh klei bi tŭ ư, Việt Nam lehanăn Singapore srăng mâo lu klei tŭ dưn msĕ, kơ dhar kreh, kơ klei mđĭ kyar, lehanăn klei mĭn kjăp kơ alŭ wăl lehanăn hŏng tar rŏng lăn. Dua nah mơak kơ dŭm boh tŭ dưn klei bi hgŭm dua nah mâo leh hlăm djăp mta bruă wưng êgao, dơ̆ng mơ̆ng bruă duh mkra, kđi čar, bi hgŭm bruă lĭng kahan, bruă mnia mblei, bruă kreh knhâo lehanăn truh kơ bruă mjuăt bi hriăm, hlŏng truh kơ bruă duh mkra mrô, bi mlih mtah, ba yua pui kmlă doh, lehanăn klei mlih mrâo hŏng klei mbruă./.