Hluê ngă hdră bi tuôm leh Klei bi kƀĭn tal 8, Anôk bruă kƀĭn ala gưl XV, tlam hruê 2/12, ti Hưng Yên, Khua gĭt gai Đảng Tô Lâm mbĭt hŏng êpul bi ala Anôk bruă kƀĭn ala čar bi tuôm leh hŏng mnuih ƀuôn sang ti ƀuôn prŏng Hưng Yên kñăm hưn mthâo boh tŭ klei bi kƀĭn tal 8 lehanăn wĭt lač klei blŭ, klei akâo mơ̆ng phung bi ala ba mơĭt kơ Anôk bruă kƀĭn ala. Leh hmư̆ Êpul bi ala čar Hưng Yên hưn mthâo kơ boh tŭ mơ̆ng klei bi kƀĭn, lu mnuih ƀuôn sang ƀuôn prŏng bi êdah klei mơak.

Gưl dlông, Anôk bruă kƀĭn ala, Knŭk kna srăng lŏ mtrŭt mđĭ bruă mkŏ dăp anôk bruă hlăm Đảng, Knŭk kna. Mñă anei jing sa hdră djŏ lehanăn srăng jing hdră čiăng bi khuăt anôk bruă knŭk kna, mđĭ boh tŭ hdră mă bruă, mguôp hŏng bruă bi hrŏ ênoh mnuih mă bruă, bi hrŏ anôk bruă mơ̆ng gưl dlông truh kơ alŭ wăl, đru mđĭ ênoh ngăn prăk knŭk kna duh kơ hdră mđĭ kyar lehanăn hluê ngă hdră mtrŭn đru kơ yang ƀuôn.

Tlam, Khua gĭt gai Đảng Tô Lâm nao čuă leh Mai Văn Vĩnh, 73 thŭn, kahan êka êkeh 81%, gŏ sang mnuih mâo bruă tŭ dưn ti să Liên Phương lehanăn gŏ sang Bùi Thị Kiêng, kkiêng thŭn 1940 ti êlan Bạch Đằng, ƀuôn hgŭm Minh Khai – gŏ sang dleh dlan mâo lu klei gĭr ktưn kpưn đĭ hlăm klei hdĭp./.