Aguah hruê 30/12, Khua gĭt gai Đảng Tô Lâm nao lehanăn gĭt gai knăm bi tuôm hŏng phung hriăm lu, phung kreh knhâo kluôm ala. Phung bi ala hưn mthâo leh boh tŭ hlăm bruă ksiêm hriăm, ba yua, mjuăt bi hriăm hlăm dŭm bruă yuôm bhăn msĕ si mdrao mgŭn, lŏ hma, kdrăp mrâo… hdră jak iêu, bi mklin lehanăn mđĭ lar bruă klam mơ̆ng phung hriăm lu, phung mă bruă kreh knhâo lehanăn ba mdah klei akâo čiăng hŏng Đảng, Knŭk kna. Blŭ ti knăm anei, Khua gĭt gai Đảng mñă, phung hriăm lu jing êpul bi ala kơ klei thâo mơ̆ng mnuih ƀuôn sang lehanăn djuê ana, jing sa hlăm dŭm boh kdrŭt yuôm bhăn ba wĭt boh tŭ êdah êdi lehanăn klei đĭ kyar mơ̆ng ala čar.

Mtă kơ bruă Đảng, bruă sang čư̆ êa dŭm gưl, brei mlih mrâo hdră mjuăt bi riăm, hrŏng ruah, ba yua mnuih thâo, phung kreh knhâo čiăng mkŏ mkra lehanăn mđĭ lar bruă klam mơ̆ng êpul anei mkăp djŏ hŏng klei čiăng đĭ kyar pral lehanăn hơĭt kjăp. Khua gĭt gai Đảng ăt mtă kơ phung hriăm lu, phung mă bruă kreh knhâo kluôm ala hnưm gĭr ktưn truh kơ thŭn 2030 brei mâo 100 mta mĭn mrâo, hdră kreh knhâo dăp hlăm ênoh anăn hdră kreh knhâo tar rŏng lăn; mta mnơ̆ng kreh knhâo, kdrăp mrâo, klei čih, hdră kdŏ mmuñ jăk hĭn. Truh thŭn 2045, êpul phung hriăm lu Việt Nam ba akŏ krĭng wăl, dôk hlăm êpul mrô sa tar rŏng lăn./.