Aguah 9/1, ti ƀuôn prŏng Hồ Chí Minh, ƀri gưl mprăp drông tết Nguyên đán Ất Tỵ 2025, mđing kơ 95 thŭn hruê mkŏ mjing  Đảng Cộng sản Việt Nam (3/2/1930-3/2/2025) Khua gĭt gai Đảng Tô Lâm nao leh anăn gĭt gai mmông bi tuôm hŏng phuang khua gĭt gai Đảng, Knŭk kna, knuă druh khua thŭn êdah êdi, phung kreh knhaoa, kdŏ mmuñ dŭm čar, ƀuôn prŏng nah Dhŭng.

Hlăm mmông bi tuôm, Khua gĭt gai Đảng Tô Lâm lač, hlăm dŭm klei bi kƀĭn mrâo êgao, bruă Đảng bi  tŭ ư kơ klei bi mklă klei thâo săng kơ ênuk mrâo, kpưn đĭ mơ̆ng djuê ana, anăn jing ênuk đĭ kyar, mdrŏng sah ti gŭ klei gĭt gai mơ̆ng Đảng Cộng sản. Wưng mphŭn ênuk mrâo jing Klei bi kƀĭn tal XIV mơ̆ng Đảng leh anăn čiăng hlue ngă dŭm hdră êlan, hdră kñăm, Đảng, Phŭn bruă kđi čar, Anôk dlăng bruă Đảng, Bruă kƀĭn ala, Knŭk kna kčah leh lu hdră êlan, hdră msir yuôm bhăn. Khua gĭt gai Đảng brei thâo, Đảng Knŭk kna bi mklă bruă mđĭ kyar pral ƀiădah hơĭt kjăp brei mkŏ mjing hlăm tur knơ̆ng kreh knhâo, kdrăp mrâo, mlih mrô leh anăn mă anak mnuih jing phŭn, mđing mđĭ kyar mnuih mă bruă . Lŏ dơ̆ng mtrŭt dŭm anôk bruă duh mkra bi liê hlăm klei ksiêm hriăm leh anăn mđĭ kyar, boh nik hlăm bruă kdrăp mrâo; mjing anôk găl ênưih kơ bruă duh mkra mphŭn čô̆ kơ bruă, mlih mrâo mbruă leh anăn mjing ênoh yuôm duh mkra mrô. Khua gĭt gai Đảng sa blư̆ dơ̆ng bi êdah klei čang hmăng čiăng lŏ dơ̆ng mâo klei đru mguôp yuôm bhăn mơ̆ng phung khua gĭt gai hđăp, phung kreh knhâo, kdŏ mmuñ - phung mđĭ ai, boh kdrŭt leh anăn ai ktang ai tiê prŏng prĭn hlăm êlan mđĭ kyar lăn čar.