Khua gĭt gai Đảng bi mni kơ boh tŭ jăk leh klei bi kƀĭn tal sa, boh nik bruă mtrŭn  Hdră mtrŭn 193 hŏng 12 klei bhiăn lông ngă kñăm hlue ngă Hdră mtrŭn 57 mơ̆ng Phŭn bruă kđi čar. Khua gĭt gai Đảng mñă klă klei mlih mrô hlăm dŭm anôk bruă Đảng mâo leh knhuang bi mlih klă, ba lu klei tŭ dưn kơ mnuih ƀuôn sang leh anăn anôk bruă duh mkra, mjing tur knơ̆ng yuôm bhăn čiăng mkŏ mjing Anôk bruă ênoh mrô ala čar.

Khădah snăn, Khua gĭt gai Đảng ăt lač kơ klei brei kƀĭn msir mgaih; mbĭt anăn, brei ruh mgaih klei dleh dlan kơ klei bhiăn, hdră êlan leh anăn rơ̆ng klei găl hlue ngă tŭ dưn. Khua gĭt gai Đảng mtă bi liê ƀiă êdi 3% prăk knŭk kna thŭn 2025 kơ klei mđĭ kyar kreh knhâo kdrăp mrâo, mđĭ 2% GDP hlăm 5 thŭn kơ anăp. Dŭm Phŭn, dhar bruă alŭ wăl kƀĭn mkŏ mjing bi leh anôk bruă nah gŭ, tur knơ̆ng mrô, boh nik anôk bruă ênoh mrô ala čar kơ anôk bruă duh mkra, kơ lăn ala, brei jhŏng ruah mnơ̆ng dhơ̆ng, hdră msir yua kdrăp mrâo, mlih mrâo mbruă, yua mrô hlăm boh sĭt.