Hlăm wưng êgao, Êpul khua êmua dŭm êpul mâo leh klei ksiêm dlăng, bi kƀĭn čiăng ksiêm dlăng bi mbŏ, bi mrâo hlăm dŭm hră mơar hưn mdah Klei kƀĭn 14 mơ̆ng Đảng, hlăm anăn mâo mta phŭn kơ mta kñăm đĭ kyar bruă duh mkra wưng thŭn 2026 – 2030 mđing truh mâo 2 ênoh mrô. Mbĭt hŏng anăn jing đa đa mta phŭn yuôm bhăn mkăn kơ bruă lĭng kahan, răng mgang klei êđăp ênang, bruă hŏng tač êngao, bruă gang mkhư̆ klei ƀơ̆ng ngăn.

Bi klă hlăm klei kƀĭn, Khua gĭt gai Đảng Tô Lâm tŭ ư hŏng hdră bi êdah mơ̆ng êpul khua êmua dŭm êpul, mbĭt anăn mñă lŏ dơ̆ng mđing hmư̆ dŭm klei blŭ mguôp hlăm klei kƀĭn čiăng mkra mlih, bi mbŏ dŭm hdră hưn mdah hŏng klei khuăt. Khua gĭt gai Đảng Tô Lâm mñă, dŭm klei hưn mdah srăng čih hluê êlan ngă bruă leh anăn ngă mtam hlăm boh sĭt čiăng kơ dŭm gưl mnuih ƀuôn sang, knuă druh, đảng viên ƀuh klă mta kñăm jing mâo tur knơ̆ng leh anăn dưi hluê ngă. Khua gĭt gai Đảng ăt lŏ mñă, dŭm hdră hưn mdah srăng bi klă boh sĭt, mâo hdră êlan djŏ čiăng hluê ngă, amâo mâo duah bi mdưm mă boh tŭ dưn ƀiădah kăn êdu ai lei.