Bi klă hlăm mmông mă bruă, Khua gĭt gai Đảng Tô Lâm mñă kơ kluôm bruă mdrao mgŭn ngă jăk hĭn bruă mdrao mgŭn, êngao kơ ngă jăk dŭm klei mtă mơ̆ng Awa Hồ hŏng bruă mdrao mgŭn, grăp čô nai aê mdrao, phung mă bruă mdrao mgŭn êngao kơ ngă jăk bruă pô čiăng mđĭ hĭn klei mĭn mpŭ leh anăn răng mgang klei hdĭp, klei suaih pral pô ruă, dlăng mtăp mđơr, amâo mâo bi kah pô ruă, mpŭ kơ pô ruă, kpă ênô, ngă jăk dŭm mta bruă pô, hriăm nanao čiăng mđĭ klei thâo, bi êdah bruă klam hŏng êpul êya leh anăn yang ƀuôn, čiăng klă sĭt jĭng amĭ ênang hlăm ală mta mnuih ruă leh anăn gŏ sang digơ̆.

Êngao kơnăn, lŏ dơ̆ng bi kjăp leh anăn mđĭ hnơ̆ng tŭ jăk bruă mdrao mgŭn nah gŭ, mđĭ hnơ̆ng kdrăp yua leh anăn bruă mkŏ mkra kơ anôk bruă mdrao mgŭn kdriêk, anôk mdrao mgŭn să, rơ̆ng kơ bruă mdrao mgŭn mâo djăp ênŭm phung aê mdrao leh anăn mnuih mă bruă mâo klei thâo, boh nik ti krĭng taih kbưi, amâo mâo mdei bi hơĭt hnơ̆ng tŭ jăk bruă mdrao mgŭn čiăng iêo jak mnuih ƀuôn sang nao mkă dlăng klei ruă ti alŭ wăl hrô kơ nao bi ksŭn ti sang êa drao nah dlông.