Aguah (2/3), ti Anôk bruă Đảng gưl dlông, Khua gĭt gai Đảng Tô Lâm gĭt gai mmông mă bruă hŏng Anôk dlăng bruă knuă Gưl dlông leh anăn dŭm anôk bruă djŏ tuôm čiăng hmư̆ leh anăn brei klei blŭ kơ Hdră bruă “Ksiêm dlăng 20 thŭn hlue ngă Hdră mtrŭn Gưl dlông 3 gưl X kơ klei mđĭ ktang bruă gĭt gai mơ̆ng Đảng hŏng bruă gang mkhư̆ klei ƀơ̆ng ngăn, luč liê mang; hưn mdah Anôk bruă Đảng gưl dlông ksiêm dlăng, mâo Hdră mtrŭn kơ bruă gang mkhư̆ klei ƀơ̆ng ngă, luč liê mang, amâo jăk hlăm wưng mrâo”.

Blŭ hrăm hlăm klei bi kƀĭn, Khua gĭt gai Đảng Tô Lâm mñă klă, gang mkhư̆ klei ƀơ̆ng ngăn, luč liê mang, amâo jăk jing bruă klam yuôm bhăn snăk, ngă nanao, sui mơ̆ng bruă mkŏ mjing, ƀư̆ mkra Đảng leh anăn bruă kđi čar. Gĭr bi kdơ̆ng, gang mkhư̆, msưh kdŭn klei ƀơ̆ng ngăn, luč liê mang, amâo jăk jing hdră êlan kluôm, sa anăn mơ̆ng Đảng, Knŭk kna drei. Kyua anăn, bruă mâo Hdră mtrŭn kơ klei mđĭ klei gĭt gai mơ̆ng Đảng hŏng bruă ƀơ̆ng ngăn luč liê mang hlăm wưng mrâo hlăm Klei bi kƀĭn gưl dlông 2 gưl XIV mtam, bi mklă klei mđing uêñ yuôm bhăn mơ̆ng Đảng, jing “klei blŭ” mơ̆ng Đảng kơ klei lŏ dơ̆ng gĭr, mđĭ ktang bruă bi blah hŏng phung roh hlăm lam hlăm wưng mrâo hŏng klei mĭn, hdră ngă mrâo.