Hluê si klei hưn, dŭm thŭn êgao, čar Gia Lai ba yua leh jih klei găl, mâo, dưi mâo dŭm boh tŭ dưn yuôm bhăn, krơ̆ng kjăp jing anôk phŭn hlăm hdră kđi čar, lĭng kahan, răng mgang klei êđăp ênang; mkŏ dăp jăk hdră bi mlih bruă duh mkra, djŏ hdră, hnơ̆ng đĭ kyar kah knar dưi mâo 6,21%/thŭn, hnơ̆ng bruă duh mkra đĭ giăm 2 blư̆ mkă hŏng akŏ wưng păn bruă. Leh hưn klă dŭm klei găl mâo ti alŭ wăl, Khua gĭt gai Đảng Tô Lâm lač klă leh klei mĭn mơ̆ng Đảng, Knŭk kna kơ bruă klam mđĭ kyar lehanăn hdră êlan kơ Gia Lai.

Khua gĭt gai Đảng mtă kơ Gia Lai lŏ ksiêm dlăng dŭm mta kñăm, bruă klam, hdră msir klă klơ̆ng, ruh mtlaih dŭm klei gun kpăk čiăng mđĭ kyar, gĭr bi leh jih mta kñăm, bruă klam mâo Hdră mtrŭn bruă Đảng čar tal XVI kčah mtrŭn. Mđing kiă kriê, mprăp jăk dŭm klei găl mkŏ mjing tŭ dưn Klei bi kƀĭn bruă Đảng dŭm gưl lehanăn Klei bi kƀĭn bruă Đảng čar tal XVII. Ƀri gưl anei, Khua gĭt gai Đảng jao leh hdră mkra anôk bruă mdrao mgŭn să Glar, kdriêk Đăk Đoa, mâo ênoh 5 êklai prăk./.