Hlăm 5 hruê, Khua gĭt gai Đảng mâo leh êbeh 40 hdră bruă hŏng dŭm hdră bi trông, bi tuôm hŏng phung mă bruă kđi čar, blŭ hrăm kơ dŭm hdră mtrŭn, bi tuôm hŏng êpul êya mnuih Việt Nam ti dua ala čar lehanăn nao čuă dŭm anôk bruă duh mkra, dhar kreh.

Ƀri gưl anei, dŭm Phŭn, dhar bruă, alŭ wăl, êpul êya, anôk bruă duh mkra Việt Nam lehanăn dua ala čar bi klă leh lu klei kuôl kă hgŭm bruă hlăm djăp mta, hlăm anăn mâo bruă mtô bi hriăm, gang mkhư̆ phung ngă soh hluh knông lăn, bruă rông mnơ̆ng hlăm êa, bruă duh mkra mrô, bi mlih mrô, bi mlih mtah, bruă ngăn prăk. Êlâo anăn, hlăm yang hruê dơ̆ng, hruê 13/3, Khua gĭt gai Đảng Tô Lâm nao lehanăn blŭ hrăm ti Klei bi kƀĭn trông anôk bruă duh mkra Việt Nam- Singapore hŏng akŏ “Việt Nam- Anôk truh mơ̆ng hdră kreh knhâo mrâo mrang lehanăn bi hgŭm bruă ngăn prăk”, hŏng klei nao hgŭm mơ̆ng giăm 100 anôk bruă duh mkra 2 ala čar. Khua gĭt gai Đảng brei thâo, hlăm wưng ti anăp Việt Nam lŏ dơ̆ng mđing jak iêu hdră FDI hlăm dŭm bruă msĕ si kreh knhâo, kdrăp mrâo, mlih mrâo lehanăn ksiêm hriăm, mđĭ kyar, bruă duh mkra mtah, duh mkra mrô, bi mlih mrô, bruă pui kmlă doh./.