Hlăm gưl nao čhưn klă klơ̆ng ti Singapore, Aguah mbruê hruê 13/3, Khua gĭt gai Đảng Tô Lâm mbĭt hŏng êpul bi ala gưl dlông Việt Nam mâo leh gưl nao čuă leh anăn mă bruă ti kdrŭn ksĭ Pansir Panjang – Sa hlăm dŭm kdrŭn ksĭ container mrâo mrang hĭn alŭ wăl Ngŏ Dhŭng Asi čiăng ksiêm hriăm kơ klei bi hmô mđĭ kyar bruă mkŏ mkra kdrŭn ksĭ mơ̆ng Singapore.

Ti kdrŭn ksĭ Pansir Panjang, Khua gĭt gai Đảng Tô Lâm leh anăn êpul mâo Nelson Quek, Khua kiă kriê gĭt gai alŭ wăl Ngŏ Dhŭng Asi leh anăn phung khua kiă kriê Êpul grŭp PSA Singapore hưn mdah klah čŭn kơ klei đĭ kyar, dŭm boh tŭ dưn dưi mâo leh anăn hdră êlan đĭ kyar êdei anăp mơ̆ng kdrŭn ksĭ. Khua gĭt gai Đảng Tô Lâm hơêč hmưi leh anăn bi myuôm dŭm boh tŭ dưn dưi mâo mơ̆ng kdrŭn ksĭ leh anăn brei thâo, kơ thŭn 2025, kyuadah Việt Nam mâo leh hnơ̆ng bi mnia mblei hlăm brô 800 êklai dolar Mi thŭn 2024 leh anăn dôk mđing truh mta kñăm 1.000 êklai dolar Mi, kyuanăn bruă dŭ mdiăng êlan êa ksĭ leh anăn kdrŭn ksĭ mâo bruă klam yuôm bhăn hlăm bruă rơ̆ng kơ mta kñăm mnia mblei mơ̆ng Việt Nam. Hŏng tur knơ̆ng anăn, Khua gĭt gai Đảng Tô Lâm hmăng hmưi PSA hnưm truh ti Việt Nam čiăng bi mguôp mđĭ kyar krŭn ksĭ ti Việt Nam kyua mâo klei hriăm mơ̆ng Singapore hlăm bruă anei jing yuôm bhăn sơnăk hŏng Việt Nam hlăm bruă bi mrâo mrang kdrŭn ksĭ leh anăn mđĭ kyar bruă logistic.