Blŭ kiă kriê klei bi kƀĭn Khua gĭt gai Đảng mñă, ară anei kluôm ala hlăk dôk ngă klei bi mlih prŏng, klei mĭn mơ̆ng Đảng mđrăm mbĭt hŏng ai tiê mnuih ƀuôn sang čhuang nao hlăm ênuk gưl mrâo, ênuk kpưn đĭ mơ̆ng djuê ana, ktưn čiăng bi leh 2 mta kñăm 100 thŭn (lăn čar dôk ti gŭ klei Đảng kiă kriê lehanăn mkŏ mjing lăn čar).

Boh nik, thŭn 2025 jing thŭn yuôm bhăn, pioh mjing atur kơ ênuk gưl mrâo, hŏng 3 mta bruă čuăn prŏng jing: Ksiêm wĭt hdră mtrŭn mrô 18 lehanăn mlih mrâo, dăp wĭt êpul khua kiă kriê hlăm kđi čar, kñăm mâo klei đĭ kyar prŏng, bi leh bruă čuăn mơ̆ng klei bi kƀĭn prŏng Đảng kluôm ala 13, lehanăn mkŏ mjing klei bi kƀĭn prŏng Đảng dŭm gưl, mprăp kơ jih jang klei bi kƀĭn prŏng Đảng gưl 14. Mơ̆ng anăn, grăp čô knuă druh hlăm adŭ bruă Đảng gưl dlông brei mâo klei mĭn, kơ bruă klam pô đru mguôp kơ klei lăn čar bi mlih prŏng./.