Nao ti knăm anei mâo êbeh 500 čô bi ala mơ̆ng dŭm anôk bruă duh mkra mrô sa mơ̆ng dua ala čar. Klei kƀĭn trông amâo djŏ knŏng jing anôk bi hgŭm mơ̆ng dŭm êpul êya bruă duh mkra ƀiădah lŏ mâo klei đua klam yuôm bhăn     hlăm bruă mđĭ klei bi hgŭm hlăm hdră duh mkra, mnia mblei lehanăn duh bi liê dua nah.

Blŭ hrăm ti anôk bi kƀĭn trông, Khua gĭt gai Đảng Tô Lâm hưn mdah leh hdră duh mkra – ala ƀuôn Việt Nam thŭn 2024 lehanăn 6 mlan akŏ thŭn 2025 dưi mâo leh dŭm boh tŭ siam, mñă thŭn 2025 amâo djŏ knŏng jing thŭn “Mđĭ kyar pral” čiăng bi leh dŭm mta kñăm mđĭ kyar mơ̆ng wưng thŭn 2021 -2025 ƀiădah lŏ mâo bruă klam yuôm bhăn, mjing tur knơ̆ng lehanăn boh kdrŭt prŏng čiăng ngă tŭ jing 2 mta kñăm 100 thŭn, ba lăn čar mŭt hlăm ênuk gưl mrâo – ênuk kpưn đĭ, sah mdrŏng, kreh dhar mơ̆ng djuê ana. Kơ hdră bi hgŭm, jak iêu klei duh bi liê ala tač êngao, Việt Nam bi mlih mơ̆ng klei mĭn, “jak iêu hluê ngă pŏk mlar” jing hdră jăk iêu êlam, mâo klei hrŏng ruah, mđing kơ hdră mrâo, hdră doh, kriê dlăng mrâo mrang, mâo boh tŭ yuôm, mâo ai lar bra, bi hgŭm mkra mjing lehanăn mkăp kơ tar rŏng lăn./.