Aguah 20/12, ti Anôk brua bi kƀĭn Ala čar (Hà Nội), Anôk kriê dlăng bruă Đảng gưl dlông, Anôk bruă kƀĭn ala, Khua lăn čar Việt Nam yang ƀuôn ngă phŭn, Dhar bruă Mặt trận čar kwar gưl dlông Việt Nam lehanăn bruă Đảng kahan gưl dlông, Phŭn bruă lĭng kahan mkŏ mjing leh Knăm bi hdơr 80 thŭn Hruê mkŏ mjing Lĭng kahan yang ƀuôn Việt Nam, 35 thŭn hruê mơak jih jang mnuih ƀuôn sang răng mgang klei êđăp ênang ala čar. Asăp hưn mthâo mâo leh Khua gĭt gai Đảng răk ti knăm anei, lač klă: Hruê 22/12/1944, Êpul Việt Nam tuyên truyền Giải phóng quân – êpul êlâo mơ̆ng Lĭng kahan yang ƀuôn Việt Nam dưi mkŏ mjing.

Hŏng klei gĭt gai, mjuăt bi hriăm mơ̆ng Đảng drei lehanăn Khua gĭt gai Hồ Chí Minh, Lĭng kahan drei đĭ kyar pral, dưi mâo lu boh tŭ êdah kdlưn. Dăl hlăm ktuê êlan hƀuê ênuk, Lĭng kahan drei mđĭ lar nanao ai tiê cách mạng, jing êpul phŭn, mbĭt hŏng jih jang mnuih ƀuôn sang răng mgang klei êđăp ênang, hnŭk êngiê, hluh lir lehanăn kluôm krĭng lăn, răng mgang Đảng, bruă sang čư̆ êa, răng mgang mnuih ƀuôn sang lehanăn hdră êlan yang ƀuôn ngă phŭn. Hruê anei, hlăm wưng cách mạng mrâo, Khua gĭt gai Đảng lač klă klei mĭn čiăng kơ Lĭng kahan yang ƀuôn lŏ dơ̆ng bi leh jih bruă klam, mbĭt hŏng Đảng, jih jang mnuih ƀuôn sang, lĭng kahan lŏ mâo dŭm boh tŭ êdah kdlưn hlăm bruă mkŏ mkra lehanăn răng mgang ala čar yang ƀuôn ngă phŭn anăn jing krơ̆ng kjăp lehanăn mđĭ hĭn klei gĭt gai kjăp mơ̆ng Đảng, hdră kriê dlăng mơ̆ng Knŭk kna hŏng Lĭng kahan yang ƀuôn Việt Nam lehanăn bi kjăp hdră lĭng kahan, răng mgang klei êđăp ênang./.