Bi hdơr hŏng klei mpŭ anăp mnguh mngăt phung kahan jhŏng ktang, djiê êngiă, Khua gĭt gai Tô Lâm lehanăn Êpul bi êdah klei lač jăk prŏng prĭn kơ phung kahan jhŏng ktang, djiê êngiă myơr leh ai hlăk, jhŏng ktang kdơ̆ng mblah, săn asei kyua klei êđăp ênang, hnŭk êngiê mơ̆ng ala čar.

Nao čuh brui mngưi bi hdơr kơ Khua gĭt gai Lê Duẩn ti Wăl bi hdơr ti alŭ Hậu Kiên, să Triệu Thành, kdriêk Triệu Phong, Khua gĭt gai Tô Lâm lehanăn êpul mă bruă bi êdah klei lač jăk anăp klei duh myơr prŏng prĭn mơ̆ng Khua gĭt gai Lê Duẩn hŏng hdră mtlaih êngiê djuê ana, hluh lir lăn čar. Čih hlăm hră djă pioh tinei, Khua gĭt gai lač klă: “Jih klei hdĭp lehanăn hdră mă bruă mơ̆ng Lê Duẩn đru mguôp leh kơ hdră mtlaih êngiê djuê ana lehanăn mkŏ mkra hdră êlan yang ƀuôn, mđĭ kyar ala čar. Dŭm klei đru mguôp, duh myơr prŏng prĭn mơ̆ng Lê Duẩn bi guh kơang leh Ala čar Việt Nam lehanăn dôk lă lar hlăm hƀuê ênuk kdrưh kơăm mơ̆ng djuê ana”./.