Blŭ hlăm mmông mă bruă, Võ Văn Thưởng lač, phŭn kčưm mơ̆ng čar Kon Tum knŏng mâo mă ƀiă, ƀiădah hŏng klei gĭr mơ̆ng Đảng leh anăn mnuih ƀuôn sang dưi mâo leh dŭm boh tŭ dưn yuôm bhăn, bruă mkŏ mjing, ƀuah mkra hlăm Đảng mâo lu boh tŭ dưn êdah êdi, mâo klei đĭ kyar hlăm klei ngă bruă, dlăng yuôm bhăn djăp mta bruă mơ̆ng phung knuă druh…

Bi kơ bruă klam mơ̆ng čar Kon Tum hlăm wưng kơ anăo, Khua hlăm êpul bruă Đảng gưl dlông Võ Văn Thưởng mñă klă: Bruă klam kñăm jing kriê dlăng mnuih ƀuôn sang. Si srăng ngă čiăng mâo boh tŭ dưn hĭn hlăm bruă bi hrŏ ƀun, mđĭ hnơ̆ng klei hdĭp mnuih ƀuôn sang. Bruă tal 2 jing rơ̆ng klei êđăp ênang hlăm krĭng mnuih djuê ƀiă. Tal 3 jing răng mgang dliê, mnơ̆ng gŭ lăn, rơ̆ng klei đĭ kyar jăk leh anăn kjăp.