Khua knŭk kna Phạm Minh Chính mñă klă, thŭn 2025 jing thŭn yuôm bhăn; jing thŭn mkŏ mjing lu klei bi kƀĭn yuôm bhăn mơ̆ng lăn čar, jing thŭn đĭ kyar, truh hdră kñăm hlue ngă Hdră kčah 5 thŭn wưng 2021-2025; jing thŭn mprăp mŭt hlăm ênuk mrâo - ênuk kpưn đĭ mdrŏng sah, kjăp ktang mơ̆ng djuê ana; mđing kơ 2 hdră kñăm hdră bruă 100 thŭn: gĭr truh thŭn 2030 jing ala čar dôk đĭ kyar, mâo bruă duh mkra mrâo mrang, prăk hrui wĭt kah knar lu; truh thŭn 2045 jing ala čar đĭ kyar.

Khua knŭk kna brei thâo, hdră kñăm mđĭ kyar thŭn 2025 mâo 8% kơ dlông bi êdah hlăm Hdră mtrŭn mrô 1 mơ̆ng Knŭk kna. Khua knŭk kna mtă brei bi trông kơ bruă phŭn jing: Ksiêm dlăng, bi tŭ ư klei thâo săng leh anăn ngă bruă, mđĭ bruă klam phung gĭt gai dŭm gưl, dŭm dhar bruă, dŭm alŭ wăl hlăm bruă hlue klei Klah čŭn mrô 123 mơ̆ng Gưl dlông, Hdră mtrŭn mơ̆ng Bruă kƀĭn ala leh anăn Hdră mtrŭn mrô 25 mơ̆ng Knŭk kna, rơ̆ng đĭ kyar kluôm ala thŭn 2025 mâo 8% kơ dlông, mjing tur knơ̆ng kjăp kơ klei đĭ kyar dua ênoh mrô hlăm wưng 2026-2030.